މާލޭ އައިސް އުޅުނު ފަތުރުވެރިއެއްގެ ދަބަސް ވަގަށްނެގި މީހަކު ހައްޔަރުކޮށްފިއެވެ.
މިމައްސަލައާއި ގުޅިގެން ފުލުހުން ހައްޔަރުކޮށްފައިވާ ގދ. ތިނަދޫ، ރަންފަރު، ޒަބީހް މުޙައްމަދު (41އ) އެވެ.
ފުލުހުން ހާމަކޮށްފައިވާ ގޮތުގައި މެރީ ބްރައުންއާ ދިމާލުން ބޮޑުތަކުރުފާނު މަގު ބުރު މަތީގައި ޗައިނާއަށް ނިސްބަތްވާ 2 ފަތުރުވެރިއެއްގެ ދަބަސް، ހަނދާންނެތި ބޭއްވިފައި ވަނިކޮށް ގެއްލިފައިވާކަމަށް އިއްޔެ 19:12 ހާއިރު ރިޕޯޓުކޮށްފައިވާ ކަމަށެވެ.
މިއާއިއެކު މިދަބަސް ހޯދުމަށް ގަލޮޅު ޕޮލިހުގެ ފުލުހުން ކުރި މަސައްކަތުން ރޭ 22:15 ހާއިރު ދަބަސް ހޯދައި ވެރިފަރާތާ ހަވާލުކޮށްފައިވާ ކަމަށް ވެސް ފުލުހުން ބުނެފައިވެއެވެ.
މީގެއިތުރުން ދަބަހުގައި ހުރި ބައެއް ތަކެތި ހޯދާފައިވަނީ ވިއްކާލާފައި ވަނިކޮށް ކަމަށާއި، އޭގައި ހުރި ތަކެތީގެ ތެރޭގައި ލެޕްޓޮޕާއި ހާޑް ޑްރައިވް، ޕަވަރ ބޭންކުގެ އިތުރުން ޕާސްޕޯޓާއި އަންނައުނު އަދި އެހެން ބައެއް ތަކެތި ހިމެނޭކަމަށް ވެސް ފުލުހުންގެ އޮފިޝަލު ބުނެފައިވެއެވެ.
މިމައްސަލަ އާއި ގުޅޭ އިތުރު ތަފްސީލެއް ފުލުހުން ހާމަކޮށްފައި ނުވާއިރު، ފުލުހުން ދަނީ މިމައްސަލަ ތަހުގީގު ކުރަމުންނެވެ.
