ފެނަކައިން ބޮޑު އަގުގައި ފޭކު ސްޕެއާތަކެއް ގަނެފައިވާ ކަމަށް ބުނެ ރަޖިސްޓްރީކޮށްގެން ހިންގާ ނޫހަކުން ފަތުރަމުންދަނީ ހަގީގަތާއި ޚިލާފު ޚަބަރުތަކެއް ކަމަށް އެ ކުންފުނިން ބުނެފިއެވެ.
ފެނަކައިން މިއަދު އާއްމުކޮށްފައިވާ ނޫސްބަޔާނެއްގައި ބުނެފައި ވަނީ، ކުންފުންޏަށް ބޭނުންވާ ސްޕެއާ ހޯދުމުގެ މަސައްކަތް އޮތީ ކުންފުނީގެ ޕްރޮކިއުމެންޓް ޕޮލިސީގައިވާ ގޮތުގެ މަތިން ޓެންޑާ ކޮމިޓީގެ މަރުޙަލާގައި ކަމަށާއި އެ ނޫހުން ރިޕޯޓުކޮށްފައިވާ ޚަބަރުގައި ހަވާލާދީފައިވާ ލިޔުންތަކުން ފެންނަ މުދަލަކީ އެ ކުންފުންޏަށް ގަނެފައިވާ މުދަލެއް ނޫން ކަމަށެވެ.
“މިއީ އަދި މިހާތަނަށް މި ކުންފުންޏަށް ގަނެފައިވާ މުދަލެއް ނޫނެވެ. އަދި އެއްވެސް އަދަދެއްގެ ފައިސާއެއް ދައްކާފައިވާ މުއާމަލާތެއް ވެސް ނޫނެވެ.” ފެނަކަ
ހަމައެޔާއެކު އެކުންފުންޏާއި ބެހޭ ގޮތުން ދައުރު ކުރަމުންދާ ޚަބަރުގައި އެ ކުންފުންނިން މި މުދާ ބޮޑު އަގުގައި ގަތްކަމަށް ބަޔާންކޮށް، ނުހިނގާ ކަމެއް ހިނގި ކަމެއްގެ ގޮތުގައި ދައްކަން މަސައްކަތްކޮށް، ކަނޑައެޅިގެން އޮޅުވާލާފައިވާ ކަމަށް ވެސް އެކުންފުނިން ބުނެފައިވެއެވެ.
މީގެއިތުރުން، ކުންފުންޏަށް މުދާ ގަންނަނީ، ފަންނީ މުވައްޒަފުންނަށް ފުރިހަމައަށް ބާރުލިބިދޭ ގޮތަށް އެކުލަވާލާފައިވާ އިޖުރާޢަތްތަކުގައި ހިމެނޭ ގިނަ މަރުހަލާތަކެއް ފުރިހަމަވެގެން ކަމަށާއި މި ހުރިހާ މަރުހަލާއެއް ފުރިހަމަވެގެން އަންނައިރު، ކުންފުންޏަށް ގަނެވޭ މުދަލުގެ ކޮލިޓީއާއި އަގު އަދި މުއްދަތު ކަނޑައެޅުމުގައި އެ މުދަލެއް ބޭނުންވާ އަސާސީ ޚިދުމަތާއި ވަގުތަށް ހާލަތަށް ރިޢާޔަތް ކުރެވޭނެ ކަމަށް ވެސް ފެނަކައިން ބުނެފައިވެއެވެ.
ފެނަކައިން ހާމަކޮށްފައިވާ ގޮތުގައި އެކުންފުނީގެ އައު މެނޭޖްމެންޓު ކުންފުންޏާއި ހަވާލުވުމަށްފަހު، ކުރިން އަމަލުކުރަމުންދިޔަ ޕްރޮކިއުމެންޓް އުސޫލުތަކުގައި ހުރި ބާގަނޑުތަކުން ލިބެމުންދިޔަ ގެއްލުންތައް ހުއްޓުވައި ކުރިން އަމަލުކުރަމުން ދިޔަ އުޞޫލުތައް ވަނީ ހަރުދަނާ ކުރެވިފަ އެވެ. އަދި އެކުންފުނިން އެންމެ އިސްކަމެއްގެ ގޮތުގައި ފެންވަރު ދަށް މުދަލާއި ހިދުމަތް ދެމުންދިޔަ “ފޭކް” ކުންފުނިތައް ނުވަތަ ވެންޑަރުން ބްލެކް ލިސްޓު ކޮށްފައިވާ ކަމަށް ވެސް އެކުންފުނިން އާއްމުކުރި ބަޔާނުގައި ބުނެފައިވެއެވެ.
ހަމައެއާއިއެކު، ކުންފުންޏަށް ޚިދުމަތްދޭ ފަރާތްތަކަކީ، ހަރުދަނާ ޓެންޑާ ޕްރޮސެސްއެއްގެ ތެރެއިން ކުންފުނީގައި ރަޖިސްޓްރީ ކުރެވި، އެއްބަސްވުމެއް ގާއިމުވުމުގެ ކުރިން ކޮމިޓީތަކުގައި އިވެލުއޭޓް ކުރެވޭ ފަރާތްތަކެއް ކަމަށް ވެސް ފެނަކައިން ބުނެފައިވެއެވެ.
ފެނަކައިން ބަޔާންކޮށްފައިވާ ގޮތުގައި ކުންފުންޏަށް މުދަލެއް ނުވަތަ ހިދުމަތެއް ފޯރުކޮށްދޭ ފަރާތްތަކުގެ ބޮލުގައި “ފޭކު” ކަމަށް އިލްޒާމު އަޅުވައި ޚަބަރު ފެތުރުމަކީ، އެ ފަރާތްތަކާއި ކުންފުންޏާއި ދެމެދު އޮންނަ ގުޅުން ހީނަރުވެ އިތުބާރު ގެއްލޭނެ ސަބަބެއް ކަމަށެވެ.
