ރާއްޖޭގައި ޤަވާއިދާއި ޚިލާފަށް އުޅޭ ބިދޭސީންގެ މައްސަލަ ތިން އަހަރު ދުވަހުގެ ތެރޭގައި ޙައްލުކުރުމަށް އިމިގްރޭޝަނުން އަމާޒު ހިފައިފިއެވެ.
މިކަން ހާމަކޮށް ކޮންޓްރޯލަރއޮފް އިމިގްރޭޝަން މުހައްމަދު ޝަމްއާން ވަހީދު ވިދާޅުވީ، ބިދޭސީންގެ މައްސަލަ ޙައްލުކުރުމަށް އިމިގްރޭޝަނުން ހިންގަމުން އަންނަ އޮޕަރޭޝަންތަކުން ރަނގަޅު އެކަށީގެންވާ ނަތީޖާއެއް ފެންނަމުން އަންނަކަމަށެވެ.
ޝައްމާން މިފަދައިން ވިދާޅުވީ، އިއްޔެ އިމިގރޭޝަނުން ހުޅުމާލޭގައި ފެށި ޚާއްސަ އޮޕަރޭޝަނާއި ގުޅޭގޮތުން ދައުލަތުގެ މީޑިޔާ ޕީއެސްއެމްއަށް ދެއްވި ބަސްދީގަތުމެއްގައެވެ.
މި އޮޕަރޭޝަންތަކާއި ގުޅިގެން ޝައްމާން ވިދާޅުވީ، އެ އިދާރާއިން ކުރިއަށް ގެންދާ އިންސްޕެކްޝަންތަކުން ޤަވާއިދާއި ޚިލާފަށް އުޅޭ ބިދޭސީން ޤަވާއިދުގެ ތެރެއަށް ވަނުމަށް ނޯޓިސް ދީފައިވާ މީހުންގެ 90 އިންސައްތަ ބިދޭސީން އެ އިދާރާއަށް ހާޒިރުވެފައިވާކަމަށެވެ.
ހަމައެޔާއެކު ލިޔެކިޔުން ރަނގަޅުކޮށް ވިސާ ރަނގަޅުކުރަން ބޭނުންވި ބިދޭސީންގެ ލިޔެކިޔުންތައް އިމިގްރޭޝަންގެ ފަރާތުން ރަނގަޅުކޮށްދީފައިވާކަމަށްވެސް ޝައްމާން ވިދާޅުވިއެވެ.
މީގެ އިތުރުން ބިދޭސީންގެ މައްސަލަ ހައްލުކުރުމަށް މިހާރު އިންސްޕެކްޝަންތައް ހިންގަމުން އަންނަނީ މާލެ ސަރަހައްދުގައި އެކަނި ނަމަވެސް މިހާރު އެ އޮޕަރޭޝަންތައް އަތޮޅުތެރެއަށް ފުޅާކުރުމަށް ތައްޔާރުކުރަން ޖެހޭ ޕްލޭންތައް ތައްޔާރުކުރަމުން އަންނަކަން ފާހަގަކުރައްވައި ޝައްމާން ވިދާޅުވީ، އަމާޒަކީ ތިން އަހަރު ތެރޭ ޤަވާއިދާ ޚިލާފު ބިދޭސީންގެ މައްސަލައަށް ހައްލެއް ހޯދުން ކަމަށެވެ.
އަޅުގަނޑުމެންގެ މުޅި ޓާގެޓަކީ މި 3 އަހަރު ތެރޭގައި ގަވާއިދާ ހިލާތަށް އުޅޭ ބިދޭސީންގެ މައްސަލަ އެއްކޮން ހައްލުކުރުން. މިހާރު ކުރެވެމުން ދަނީ އެ މަސައްކަތް – ޝައްމާން
އެގޮތުން މި އަމާޒަށް ވާޞިލްވުމަށްޓަކައި އިމިގްރޭޝަނުން ހިންގަމުން އަންނަ އޮޕަރޭޝަންތަކުގައި ވިޔަފާރިތަކުން އެއްބާރުލުންދީ، ވަޒީފާތަކުގައި ޤަވާއިދާ ޚިލާފަށް އުޅޭ ބިދޭސީން ނުގެންގުޅުމަށް ޝައްމޫން ވަނީ އިލްތިމާސް ކުރައްވައިފައެވެ.
އިއްޔެ ހިންގި އޮޕަރޭޝަނުގައި އިމިގްރޭޝަނުންވަނީ ހުޅުމާލޭގެ 27 ޒޯނެއް ބަލައިފާސްކޮށްފައެވެ.
