އައްޑޫ ސިޓީއަށް ފެނުގެ ޚިދުމަތް ދިނުމަށް ހިންގަމުން އަންނަ ފެން އުފައްދާ އާރުއޯ ޕްލާންޓުގެ ބޯރްހޯލް ޕަންޕަން މައްސަލައެއް ދިމާވެ އައްޑޫ ސިޓީން ފެން ކެނޑިއްޖެއެވެ.
މި މައްސަލައާއި ގުޅިގެން ފެނަކައިން ވިދާޅުވީ މި މައްސަލަ ދިމާވެފައިވަނީ އައްޑޫ ސިޓީގެ ގުޅިފައިވާ ރަށްތަކަށް ފެން އުފައްދާ އާރުއޯ ޕްލާންޓުގެ ބޯރްހޯލް ޕަންޕަށް ދިމާވި މައްސަލައަކާ ގުޅިގެން ޕްލާންޓް ހުއްޓުމުގެ ސަބަބުން ކަމަށެވެ.
އެގޮތުން މި މައްސަލަ ޙައްލުކޮށް އެ ޕަންޕު އޮޕަރޭޝަނަށް ގެނައުމުގެ މަސައްކަތް ކުރަމުންދާ ކަމަށާއި މައްސަލަ ހައްލު ވަންދެން ފެން އުފެއްދުން ހުއްޓިފައިވާތީ، އައްޑޫ ސިޓީގެ ގުޅިފައިވާ ރަށްތަކަށް ފޯރުކޮށްދޭ ފެން ހުސްވެ، ހިދުމަތް މެދުކެނޑުމަކީ އެކަށީގެންވާ ކަމެއް ކަމަށް ފެނަކައިން ވިދާޅުވެއެވެ.
ފެނަކައިން ވަނީ ފެނުގެ ޚިދުމަތް މެދުކެނޑުމުގެ ސަބަބުން ދިމާވެދާނެ ދަތިތަކަކަށްޓަކައި ނިހާޔަތަށް މައާފަށް އެދޭ ކަމަށެވެ.
