ރާއްޖޭގައި ބޮއްސުންލައިފައިވާ ބިދޭސީންގެ މައްސަލަ ޙައްލުކުރުމަށް ހޯމް މިނިސްޓްރީން އިމިގްރޭޝަނާއި ގުޅިގެން ފުޅާ ގޮތެއްގައި ހިންގަމުން އަންނަ އޮޕަރޭޝަންގެ ތެރެއިން އިއްޔެ ހުޅުމާލޭގެ ފިޔަވަހި 1 އަދި 2 ގައި ކުރިއަށް ގެންދިޔަ އޮޕަރޭޝަން ތަކުގެ ތެރެއިން ޖުމުލަ 314 ތަނެއް ބަލައި ފާސްކޮށްފައިވާކަމަށް އިމިގްރޭޝަނުން ހާމަކޮށްފިއެވެ.
އެގޮތުން ކަމާއި ގުޅުން ހުރި އިދާރާތަކާއި ގުޅިގެން އިއްޔެ ހުޅުމާލޭގައި އިމިގްރޭޝަންގެ 200 އަށްވުރެ ގިނަ އޮފިސަރުންނާއެކު ކުރިއަށް ގެންދިޔަ މާސް އިންސްޕެކްޝަން ކުރިއަށް ގެންގޮއްސައި ވަނީ ޖުމުލަ 27 ޒޯނަކަށް ބަހާލައިގެންނެވެ.
އެގޮތުން އިންސްޕެކްޝަންގެ ތެރެއިން ޖުމްލަ 314 ތަން ބަލައި ފާސްކޮށް 769 ބިދޭސީންނާ ސުވާލުކޮށްފައިވާ ކަމަށާއި ޤަވާއިދާއި ޚިލާފަށް މުވައްޒަފުންގެ ގޮތުގައި ބިދޭސީން ގެންގުޅެމުން ދިޔަ 92 ދިވެއްސަކަަށް ނޯޓިސް ދީފައިވާ ކަަމަށް މޯލްޑިވްސް އިމިގްރޭޝަނުން ހާމަކޮށްފައިވެއެވެ.
އަދި ސުވާލުކުރެވުނު ބިދޭސީންގެ ތެރެއިން ޤަވާއިދާ ޚިލާފަށް އުޅޭ ބިދޭސީންނާއި ފިލައިގެން އުޅޭކަމަށް ރިޕޯޓުކޮށްފައިވާ ބިދޭސީން ހިމެނޭހެން 28 މީހަކު އިމިގްރެޝަންގެ ބެލުމުގެ ދަށަށް ގެނެވިފައިވާކަމަށްވެސް އިމިގްރޭޝަނުން ހާމަކުރެއެވެ.
އަދި ވިސާ ފުރިހަމަ ނޫން 165ބިދޭސީންނަށް އިމިގްރޭޝަނަށް ހާޒިރުވުމަށް ނޯޓިސްދީފައިވާއިރު އިމިގްރޭޝަނުން ބުނާ ގޮތުގައި ދެވުނު ނޯޓިސްއާއި އެއްގޮތަށް އަމަލު ނުކޮށްފިނަމަ މި ފަރާތްތަކާއި މެދު އިމިގްރޭޝަން ޤާނޫނުގެ ދަށުން ފިޔަވަޅު އެޅުމަށް ވަނީ ނިންމައިފައެވެ.
އެ އިދާރާއިން ބުނެފައިވާ ގޮތުގައި އިއްޔެ ކުރިއަށް ގެންދެވުނު މާސް އިންސްޕެކްޝަންގެ ބޭނުމަކީ، ދީފައިވާ ހުއްދައިގެ ބޭރުން ރާއްޖޭގައި އުޅެމުން އަންނަ ބިދޭސީންނާއި ޤަވާއިދާ ޚިލާފަށް ކުދި އަދި މެދު ފަންތީގެ ވިޔަފާރި ކުރަމުން އަންނަ ބިދޭސީން ދެނެގަނެ، އެފަރާތްތަކަށް އިމިގްރޭޝަނަށް ހާޒިރުވުމަށް އަންގައި، އަދި މިފަދަ ބިދޭސީން ލައްވައި މަސައްކަތްކުރުވާ ދިވެހިންނަށް ލިޔުމުން ނަސޭހަތްދިނުން ކަމަށެވެ.
އިއްޔެގެ އިންސްޕެކްޝަން ކުރިއަށް ގެންގޮއްސައި ވަނީ، މޯލްޑިވްސް ޕޮލިސް ސަރވިސް، މިނިސްޓްރީ އޮފް އެކޮނޮމިކް ޑިވެލޮޕްމަންޓް، ހެލްތް ޕްރޮޓެކްޝަން އެޖެންސީ އަދި މޯލްޑިވްސް ފުޑް އެންޑް ޑްރަގް އުތޯރިޓީއާއިވެސް ގުޅިގެން އެ އިދާރާތަކުގެވެސް ބައިވެރިވުމާއެކުގައެވެ.
