ހުޅުމާލާ ތިންވަނަ ފިޔަވަހީގެ ބައެއް ސަރަޙައްދުގައި ހުރި ތަކެތި ނަގައި އެ ބިންތައް ހުސްކުރުމަށް އަންގައިފިއެވެ.
ހުޅުމާލޭ ޑިވެލޮޕްމަންޓް ކޯޕަރޭޝަން (އެޗްޑީސީ)ން ކުރި އިއުލާނެއްގައި ބުނެފައިވަނީ މީގެ ކުރިންވެސް އެ ބިން ހުސްކުރުމަށް އެ ކޯޕަރޭޝަނުން އިއުލާނުކޮށްފައިވާނެ ކަމަށާއި އެ އިއުލާނަށް ގިނަ ބަޔަކު އިޖާބަދީފައި ނުވާކަމަށެވެ.
އެގޮތުން ހުޅުމާލެ ދެވަނަ ފިޔަވަހީގެ ޗެނަލް ޕްރޮޖެކްޓް 2 ފެށުމަށް ހަމަޖެހިފައިވާ ސަރަހައްދު ހުސްކުރުމަށް އެ ކޯޕަރޭޝަނުން މިދިޔަ ޖެނުއަރީ މަހުގެ 30 ވަނަ ދުވަހު އަދި ހުޅުމާލޭގެ ދެވަނަ އަދި ތިންވަނަ ފިޔަވަހީގެ ހުސް ބިންތަކުގައި ޤަވާއިދާ ޚިލާފަށް ބަހައްޓާފައިވާ ތަކެތި ނެގުމަށް މިދިޔަ މެއި މަހުގެ 8 ވަނަ ދުވަހު އިއުލާނުކޮށްފައިވާނެކަމަށް އެ އޯޕަރޭޝަނުން ބުނެފައިވެއެވެ.
އެގޮތުން ހުޅުމާލޭގެ ތިން ވަނަ ފިޔަވަހީގެ އެކި ސަރަޙައްދުތަކުގައި ޤަވާއިދާ ޚިލާފަށް މުދަލާއި ތަކެތި ބަހައްޓައިގެ ބޭނުންކުރަމުންދާ ބިންތައް މި މަހުގެ 11 ވަނަ ދުހުގެ ކުރިން ނެގުމަށް އެޗްޑީސީގެ އިއުލާނުގައި ވަނީ ބުނެފައެވެ.
އެގޮތުން މިހާރު ދެވިފައިވާ މުހުލަތުގެ ތެރޭގައި އެ ބިންތައް ހުސްކޮށް އެތަންތަނުގައި ހުރި ތަކެތި ނުނަގައިފި ނަމަ، އެތަކެއްޗަކީ ވެރިފަރާތްތަކުން ބޭނުން ނެތިގެން ދޫކޮއްލާފައިވާ ތަކެތި ކަމުގައި ބަލައި އެފަދަ ތަކެއްޗާމެދު އެޗްޑީސީން އަމަލުކުރުމަށް ހަމަޖެހިފައިވާ ގޮތުގެ މަތިން އަމަލު ކުރެވޭނެ ކަމަށް އެ ކޯޕަރޭޝަންގެ އިއުލާނުގައި ވަނީ ބުނެފައެވެ.
އަދި ހަމައެޔާއެކު އެފަދަ ތަކެތި ނެގުމުގެ މަސައްކަތުގެ ތެރޭގައި ލިބޭ ގެއްލުމަކަށް އެޗްޑީސީން ޒިންމާ ނުނަގާނެކަމުގައިވެސް އެޗްޑީސީން ވަނީ ބުނެފައެވެ.
