މިދިޔަ ރިޔާސީ އިންތިޚާބުގެ ކެމްޕެއިން ދަތުރުތަކަށް އޭރުގެ ވެރިކަން ކުރާ ޕާޓީ އެމްޑީޕީން، ޤައުމީ އެއަރލައިން މޯލްޑިވިއަން މެދުވެރިކޮށް ކުރި ދަތުރުތަކަށްވާ ފައިސާތައް ދައްކައި ޚަލާސްކުރުމަށް އެ ޕާޓީއާއި މޯލްޑިވިއަނާއި ދެމެދު އެއްބަސްވުމަކަށް އަތުވެއްޖެއެވެ.
އެ ދަތުރުތަކަށްވާ ފައިސާގެ ތެރެއިން މޯލްދިވިއަނުން ނުދައްކާ އޮތް 5.6 މިލިޔަން ރުފިޔާ ހޯދުމަށް މޯލްޑިވިއަނުން ވަނީ ސިވިލް ކޯޓަށް މައްސަލަ ހުށަހަޅައިފައެވެ.
އެގޮތުން މޯލްޑިވިއަންގެ ޗާޓާ ފްލައިޓް އަދި ޝެޑިއުލް ފްލައިޓްތަކުން ކްރެޑިޓް އުސޫލުންނަގާފައިވާ ޓިކެޓްތަކަށް ނުދައްކައިވާ 5،629،861 ރުފިޔާ އެއްބަސްވެފައިވާ ގޮތަށް ދައްކައިފައި ނުވާތީ، އެ ކުންފުންޏަށް ލިބުނު ގެއްލުމަށް އަދުލުވެރި ބަދަލެއް ނަގައިދިނުމަށް އެދި، ހަތް ދުވަސް ތެރޭގައި އެ ފައިސާ ހޯދައިދިނުމަށް މޯލްޑިވިއަނުން ވަނީ ސިވިލް ކޯޓުގައި އެދިފައެވެ.
މި މައްސަލައާއި ގުޅިގެން ސިވިލް ކޯޓުން ބުނެފައިވަނީ މޯލްޑިވިއަނާއި އެމްޑީޕީއާއި ދެމެދު މިދިޔަ ޖޫން މަހުގެ 13 ވަނަ ދުވަހު އެއްބަސް ވެފައިވާ ގޮތަށް އިންސްޓޯލްމަންޓުގެ ގޮތުގައި ދައްކަންޖެހޭ 1،000،000 ރުފިޔާ، އެއްބަސްވުން ހެދި ދުވަހު އެމްޑީޕީން ދައްކައިފައިވާކަމަށެވެ.
މި އެއްބަސްވުމާއެކު މޯލްޑިވިއަނުން ވަނީ ފައިސާ ހޯދުމަށް ސިވިލް ކޯޓަށް ހުށަހެޅި މައްސަލަ އަނބުރައި ނަގައިފައެވެ.
އެހެން ނަމަވެސް އެ ދެފަރާތުގެ ދެމެދުގައި އެއްބަސްވެވުނު ގޮތަށް އެމްޑީޕީން އެ ފައިސާ ނުދައްކައިފި ނަމަ އަލުން އެ ކޯޓަށް މައްސަލަ ހުށަހެޅުމުގެ އިޚްތިޔާރު ސިވިލް ކޯޓުން ވަނީ މޯލްޑިވިއަނަށް ދީފައެވެ.
ރިޔާސީ އިންތިޚާބުގެ ދަތުރުތަކުގައި އެމްޑީޕީން މޯލްޑިވިއަން މެދުވެރިކޮށް ދަތުރުކޮށްފައިވަނީ ޚިދުމަތް ހޯދާތާ 48 ގަޑިއިރު ތެރޭގައި ފައިސާ ދައްކާގޮތަށެވެ.
އެހެން ނަމަވެސް އެ ފައިސާ ނުދައްކައި ލަސްވުމުގެ ސަބަބުން އެކި ފަހަރު މަތިން ސިޓީ ފޮނުވައިގެން ވެސް އެ ފައިސާ ދައްކާފައި ނުވާ ކަމަށް އެ ކުންފުނިން މީގެ ކުރިން ހާމަކޮށްފައިވެއެވެ. އަދި އެ ފައިސާ ނުދައްކައިގެން ކޯޓަށް މައްސަލަ ވައްދާނެ ކަމުގެ އިންޒާރު ވެސް ދިނެވެ.
