ރައީސުލްޖުމްހޫރިއްޔާ ޑރ މުޙައްމަދު މުޢިއްޒު މިހާރު އިންޑިޔާއަށް ކުރައްވަމުން ގެންދަވާ ފުރަމާނަ ދަތުރުފުޅުން ކުރިއަށް ފެންނަނީ އުއްމީދީ އަދި އުފާވެރި ދުވަސްތަކެއް ކަމުގައި ޖުމުހޫރީ ޕާޓީގެ ލީޑަރ އަދި ރައްޔިތުންގެ މަޖިލިހުގެ މާމިގިލި ދާއިރާގެ މެމްބަރު ޤާސިމް އިބްރާހީމް ވިދާޅުވެއްޖެއެވެ.
އިންޑިޔާ ސަރުކާރުގެ ޚާއްސަ ދާޢުވަތަކަށް ރައީސް މިހާރު އިންޑިޔާއަށް ކުރައްވަމުން ގެންދަވާ ދަތުރުފުޅާއި ގުޅިގެން އެކްސްގައި ކުރެއްވި ޕޯސްޓެއްގައި ޤާސިމް ވިދާޅުވީ، ރައީސް އިންޑިއާ ކުރައްވާ ދަތުރުފުޅުން އުންމީދީ އަދި އުފާވެރި ދުވަސްތަކެއް ކުރިއަށް އޮތް ކަމަށެވެ.
މީގެ އިތުރުން ޤާސިމްގެ ޕޯސްޓްގައި ވިދާޅުވީ، މި ދަތުރުފުޅު ވެގެންދާނީ، ދެޤައުމުގެ ދެމެދުގައި އޮންނަ ގުޅުން އިތުރަށް ބަދަހިކުރަން ލިބޭނެ ވަރަށް މުހިންމު ފުރުސަތަކަށް ކަމުގައެވެ.
https://x.com/qasimibrahim/status/1843087879867883537
މީގެ އިތުރުން އިންޑިޔާ އާއި ރާއްޖެއާއި ދެމެދުގެ ގުޅުން އިތުރަށް ހަރުދަނާ ކުރެއްވުމަށް ކުރެވެން ހުރި ހުރިހާ ކަމެއް ކުރެއްވުމަށް ޖުމްހޫރީ ޕާޓީގެ ލީޑަރުގެ ހައިސިއްޔަތުން ރައީސަށް އިލްތިމާސްކުރައްވައިފައެވެ.
އަދި އިންޑިއާ ކަނޑުގެ ސަރަހައްދުގެ ހަމަޖެހުމާއި ސަލާމަތާއި ރައްކާތެރިކަން ކަށަވަރުކޮށް، އިޤަތިސާދީ ތަރައްގީގެ އައު އުސްމިންތަކެއް ހާސިލުކުރުމަށް އިންޑިއާއާއި ރާއްޖެއާއި ދެމެދު އޮތް ގުޅުމަކީ ވަރަށް ވެސް މުހިންމު ގުޅުމެއްކަން ޤާސިމް ވަނީ ފާހަގަކުރައްވައިފައެވެ.
ރައީސް އިންޑިޔާއަށް ކުރައްވަމުން ގެންދަވާ ދަތުރުފުޅުގައި އިއްޔެ ވަނީ ނިއު ދިއްލިއަށް ވަޑައިގެން އެ ޤައުމުގެ އެކްސްޓާނަލް އެފެއަރޒް މިނިސްޓަރ ޖައިޝަންކަރާއި ބައްދަލުކުރައްވައިފައެވެ.
އަދި މިއަދު އެ ޤައުމުގެ ބޮޑުވަޒީރު ނަރެންދްރަ މޯދީއާ ބައްދަލުކުރައްވަން ހަމަޖެހިފައިވާއިރު، ދެ ޤައުމުގެ ދެމެދުގައި ފަސް އެއްބަސްވުމެއްގައި ސޮއި ކުރުމަށް ހަމަޖެހިފައިވެއެވެ.
