މުދަލު ޒަކާތް ނަގާ ނިޞާބަށް މި އަހަރު ތިން ވަނަ ފަހަރަށް މޯލްޑިވްސް ޒަކާތު ހައުސުން ބަދަލު ގެނެއްސިއެވެ.
އެގޮތުން އެ އިދާރާއިން ހާމަކުރި ގޮތުގައި، މުދަލު ޒަކާތުގެ ނިޞާބު ކަނޑައެޅުމަށް އެ އިދާރާއިން ޢަމަލުކުރާ އުސޫލުގެ ދަށުން މި މަހުގެ 10 ވަނަ ދުވަހުން ފެށިގެން މުދަލު ޒަކާތް ނަގަމުން އަންނަ ނިޞާބަށް ވަނީ ބަދަލު ނެގެވިފައެވެ.
މުދަލު ޒަކާތުގެ ނިޞާބުގެ ގޮތުގައި އަލަށް ކަނޑައަޅައިފައިވާ އަދަދަކީ، 9240.35 ދިވެހި ރުފިޔާއެވެ.
އެންމެ ފަހުން މުދަލު ޒަކާތުގެ ނިޞާބަށް ބަދަލު ގެނެސްފައިވަނީ، މި އަހަރުގެ މެއި މަހުއެވެ. އޭރު މުދަލު ޒަކާތުގެ ނިޞާބުގެ ގޮތުގައި ކަނޑައެޅި އަދަދަކީ، 9353.40ރ ރުފިޔާ އެވެ.
ރާއްޖޭގައި ޒަކާތުގެ ނިޞާބުގެ މިންވަރު ކަނޑައަޅަނީ ރިހީގެ އަގަށް ބަލައިގެންނެވެ. ރިހީގެ އަގަށް އަންނަ ބަދަލަކާ ގުޅިގެން ޒަކާތުގެ ގޮތުގައި ދައްކަން ޖެހޭ ދިވެހި ފައިސާގެ މިންވަރު ވެސް ބަދަލުވެގެންދެއެވެ.
މުދަލުގެ ޒަކާތު ވާޖިބުވަނީ އެމީހެއްގެ އަތުގައި ނިޞާބުގެ މިންވަރު ނުވަތަ އެއަށްވުރެ ގިނަ ފައިސާ ހަމަވެފައި ހުންނަތާ އެއް އަހަރުވެފައިވާ ފައިސާ އާއި ތަކެތިންނެވެ. ޒަކާތް ނެރެންޖެހޭނީ އެ އަދަދެއްގެ 40 ބައި ކުޅަ އެއްބައެވެ. އެއީ 2.5 އިންސައްތައެވެ.
