އިންޑިޔާއިން ރާއްޖެއައި އެ ޤައުމުގެ ދެމަފިރިއެއްގެ އަތުން ފެނުނު 2 ކިލޯގެ މަސްތުވާ ތަކެއްޗާއެކު އެ ދެމަފިރިން ވެލާނާ އިންޓަރނޭޝަނަލް އެއަރޕޯޓުން ހައްޔަރުކޮށްފިއެވެ.
2 ކިލޯގެ މަސްތުވާތަކެއްޗާއެކު އެއަރޕޯޓުން އިއްޔެ ހައްޔަރު ކޮށްފައިވަނީ، އިންޑިޔާއަށް ނިސްބަތްވާ އުމުރުން 41 އަހަރުގެ މުހައްމަދު ޝޯއިބާއި އޭނާގެ އަންހެނުން އައިޝާ (38އ) އެވެ.
އެގޮތުން މި ދެމީހުންވެސް ކަސްޓޯޑިއަލް ޖަލެއްގައި ބަންދުކުރުމަށް ނިންމައި ކްރިމިނަލް ކޯޓުން ކުރި އަމުރުގައި ބުނެފައިވަނީ، މި ދެމީހުންގެ މައްޗަށް ކުރެވޭ މަސްތުވާތަކެތި ޓްރެފިކް ކުރުމުގެ ކުށުގެ ތުހުމަތު ދެމީހުންގެ މައްޗަށްވެސް ސާބިތު ކުރެވޭ ވަރަށް ފުދޭ ހެކި އެ ކޯޓަށް ހުށަހަޅާއިފައި ވާކަމަށެވެ.
އެގޮތުން މި ދެމީހުންގެ ބަންދު ޝަރީޢަތުގައި ފުލުހުންގެ އިންވެސްޓިގޭޝަން އޮފިސަަރު (އައިއޯ) ވަނީ، މި ދެމަފިރިން ރާއްޖެއައި އިރު ގެނައި ލަގެޖުގައި ފޮރުވާފައި ހުރި ދެ ކިލޯގެ މަސްތުވާތަކެތި ފެނިފައިވާކަމަށް ބުނެފައެވެ.
މީގެ އިތުރުންވެސް އެ ސީނަށް ދިޔަ ފުލުހުންގެ ބަޔާން ވަނީ ކޯޓަށް ހުށަހަޅައިފައެވެ.
މި ދެމީހުން 3 ދުވަހަށް ބަންދުކުރުމަށް ނިންމައިފައިވަނީ އެ ދެ މީހުންނަށް ހިންދީ ބަސް އެނގޭ ތަރުޖަމާނަކު ހަމަޖެހިފައި ނުވުމުންކަމަށް ކޯޓު އަމުރުގައި ބުނެފައިވާއިރު، އެ ދެ މީހުންނަށް ވެސް ވަނީ ވަކީލަކު ހަމަޖެއްސުމުގެ ފުރުސަތު އޮތް ކަން އަންގައިފައެވެ.
ރާއްޖެ އެތެރެކުރާ މަސްތުވާތަކެތި އަތުލައިގަތުމަށް ކަސްޓަމްސްގެ އޮޕަރޭޝަންތައް ވަރުގަދަކޮށްފައި ވާއިރު، މި ފަހުން ދޭތެރެ ދޭތެރެއިން މަސްތުވާ ތަކެއްޗާއެކު އެއަރޕޯޓުން މީހުން ހައްޔަރުކުރާ މިންވަރު އިތުރުވެފައިވާކަން ފާހަގަކޮށްލެވެއެވެ.
އޭގެ ތެރޭގައި ދިވެހިންނާއި ބިދޭސީންވެސް ހިމެނެއެވެ.
