ކޮމަންވެލްތްގެ ބައްދަލުވުމެއްގައި ބައިވެރިވެ ވަޑައިގަތުމަށްޓަކައި ނައިބްރައީސް ހުސައިން މުހައްމަދު ލަތީފް ސަމޯއާއަށް ފުރައިވަޑައިގެންފިއެވެ.
މި އަހަރު އޮންނަ ކޮމަންވެލްތު އިސްވެރިންގެ ބައްދަލުވުމުގައި ނައިބްރައީސް ބައިވެރިވެ ވަޑައިގަންނަވާއިރު، މި ބައްދަލުވުމުގެ ގިނަ ދަންފަޅިތަކުގައި ބައިވެރިވެ ވަޑައިގެން ނައިބްރައީސް ގިނަ ދާއިރާތަކަކުން ތަޤުރީރުކުރައްވާނެ ކަމުގައި ރައީސް އޮފީހުން ހާމަކުރެއެވެ.
މާދަމާއިން ފެށިގެން މި ހަފްތާގެ ހޮނިހިރު ދުވަހުގެ ނިޔަލަށް ކުރިއަށް ގެންދިއުމަށް ހަމަޖެހިފައިވާ ކޮމަންވެލްތު އިސްވެރިންގެ ބައްދަލުވުމަކީ، އެކި އެކި ދާއިރާތަކުން ބައިނަލްއަގުވާމީ ފެންވަރުގައި މަޝްވަރާތައް ބަދަލުކުރެވި ގޮތް ނިންމިގެންދާ މަންސައެކެވެ.
އެގޮތުން މި ބައްދަލުވުމުގެ ތެރެއިން މަޝްވަރާކުރެވޭ ބައެއް ދާއިރާތަކުގެ ތެރޭގައި އިގުތިޞާދީ، މޫސުމީ އަދި ސަލާމަތީ ގޮންޖެހުންތަކާ ކުރިމަތިލުމަށް އެކުގައި މަސައްކަތްކޮށް، ވިލުންތެރިކަމާއި، ވިޔަފާރި ކުރިއެރުވުމާއި ދެމެހެއްޓެނިވި ކުރިމަގެއް ބިނާކުރުން ހިމެނެއެވެ.
މި އަހަރުގެ ބައްދަލުވުން ފާހަގަކުރެވިގެން ދަނީ އދ.ގެ މޫސުމަށް އަންނަ ބަދަލުތަކާ ގުޅޭ 29 ވަނަ މަހާސިންތާ (ކޮޕް 29) ގެ ކުރިން، ދެމެހެއްޓެނިވި ތަރައްގީ އާއި މޫސުމަށް އަންނަ ބަދަލުތަކާ ގުޅުންހުރި ފިޔަވަޅުތަކާމެދު މަޝްވަރާކުރުމަށް މެންބަރު ގައުމުތަކަށް މުހިއްމު ފުރުސަތެއް ލިބިގެންދާނެ ބައްދަލުވުމެއްގެ ގޮތުގައެވެ.
