އެމްޑީޕީން ޤާނޫނު އަސާސީ އާއި ޚިލާފަށް ކޮށްފައި ހުރި ކަންކަމަށް ޖަވާބުދާރީ ވާން ޖެހޭނެ ކަމަށް ނައިބު ރައީސް ހުސެއިން މުހައްމަދު ލަތީފު ވިދާޅުވެއްޖެއެވެ.
ނައިބު ރައީސް މިހެން ވިދާޅުވެފައިމިވަނީ، ކުރީ ސަރުކާރުން ދައުލަތުގެ ހިސާބުތައް ބެލެހެއްޓުމުގައި ގޯސްތަކެއް ހަދާފައިވާ ކަމަށް ބުނެ އެ މައްސަލަ އޮޑިޓަރ ޖެނެރަލްގެ އޮފީހަށް ހުށަހެޅާފައި ދަނޑިވަޅެއްގައެވެ.
މިކަމާއި ގުޅޭ ގޮތުން ކުރީގެ ފިނޭންސް މިނިސްޓަރު އިބްރާޙިމް އަމީރު ވިދާޅުވީ، މާލީ ހިސާބުތައް އޮޅުވާލީ ރައީސް އޮފީހުގެ ނުފޫޒުން ކަމަށާއި މާލީ ހިސާބުތަކާއި މެދު ސަރުކާރުން ހަދަނީ ބުހުތާން ދޮގުކަމަށް ކަމަށެވެ.
މިކަމަށް ރައްދުދެއްވައި މިއަދު އެކްސްގައި ކުރެއްވި ޕޯސްޓެއްގައި ނައިބު ރައީސް ވިދާޅުވީ، މިއަދު ފެންނަނީ އެމްޑީޕީގެ ސުޕަރ މެޖޯރިޓީ ބޭނުންކޮށްގެން ނަހަމަ ގޮތުގައި ކުރަމުންދިޔަ ކަންކަން ފަސްއަޅައި ފޮރުވުމުގެ ނަތީޖާ ކަމަށެވެ.
އެގޮތުންކޮވިޑު 19ގެ އާލަމީ ވަބާގައި ދިވެހި ދައުލަތަށް ލިބުނު އެހީތައް ވެސް މި ބީދައިން ފޮރުވައިފައި ކަމަށް ވެސް އެމަނިކުފާނު ވިދާޅުވިއެވެ.
ނައިބު ރައީސް އިތުރަށް ވިދާޅުވީ ޤާނޫނު އަސަސީ އާއި ޚިލާފަށް ކޮށްފައިވާ ކަންކަމަށް އެމްޑީޕީން ފުރިހަމައަށް ޖަވާބުދާރީ ވާން ޖެހޭނެ ކަމަށެވެ.
