އިސްރާއީލުގެ ޕާސްޕޯޓް މަނާކުރުމަށްޓަކައި އިމިގްރޭޝަން ޤާނޫނަށް ގެންނަން ޖެހޭ ބަދަލުތައް ގެނައުމަށް ރައްޔިތުންގެ މަޖިލިހަށް ހުށަހަޅައިފައިވާ ބިލުގެ މަސައްކަތް ކުރިއަށް ނުގޮސް ދިގުލައިގެން ދިއުމުގެ ސަބަބުން މަޖިލިހަށް ހުށަހެޅި ކުއްލި މައްސަލަ މަޖިލިހުގެ ތަޅުމުން ބޭރުކޮށްލައިފިއެވެ.
އިސްރާއީލު ޕާސްޕޯޓްގައި ރާއްޖެ އެތެރެ ނުވެވޭ ގޮތް ހެދުމަށްޓަކައި އިމިގްރޭޝަން ޤާނޫނަށް އިސްލާހު ގެނައުމުގެ ބިލު މަޖިލިހަށް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމެވެ.
އެގޮތުން އިސްރާއީލުގެ ޕާސްޕޯޓްގެ އިތުރުން އިސްރާއީލު ޕާސްޕޯޓާއެކު އެހެން ގައުމެއްގެ ޕާސްޕޯޓު ބޭނުންކުރާ މީހުންނަށްވެސް ރާއްޖެއަށް އެތެރެނުވެވޭ ގޮތަށް ޤާނޫނަށް އިސްލާހު ގެނައުމަށް ހުށަހެޅި ބިލު، މަޖިލީހަށް ބަލައިގަނެ، ބިލު ދިރާސާ ކުުރުމަށް މި އަހަރުގެ ޖޫން މަހުގެ 10 ވަނަ ދުވަހު ވަނީ ރައްޔިތުންގެ މަޖިލިހުގެ ސަލާމަތީ ޚިދުމަތްތަކާ ބެހޭ ކޮމިޓީއަށް ފޮނުވައިފައެވެ.
އެހެން ނަމަވެސް އެ ބިލު ކޮމެޓީއަށް ފޮނުވި ފަހުން މިއަދާއި ހަމައަށް 133 ދުވަސް ވެފައިވާއިރުވެސް މި ބިލާއި ގުޅިގެން އެއްވެސް މަސައްކަތެއް ކޮމެޓީ މަރުހަލާގައި ކުރިއަށް ގެންގޮއްސައެއް ނުވެއެވެ. އަދި ސަލާމަތީ ކޮމެޓީގެ އެއްވެސް ބައްދަލުވުމެއްގައި މި ބިލުގެ މަސައްކަތް ތާވަލުކޮށްފައެއްވެސް ނުވެއެވެ.
އެކަމާ ގުޅިގެން ރައްޔިތުންގެ މަޖިލިހުގެ ތަޅުމަށް ގަލޮޅު އުތުރު ދާއިރާގެ އެމްޑީޕީގެ މެންބަރު މުހައްމަދު އިބްރާހިމް (ކުޑޫ) ހުށަހެޅި ކުއްލި މައްސަލައިގައި ކުއްލި މައްސަލައެއްގައި ހަމަވާންޖެހޭ ޝަރުތުތައް ހަމަ ނުވާކަމަށް ވިދާޅުވެ، މަޖިލީހުގެ ރައީސް އަބްދުއްރަހީމް އަބްދުއްﷲ ވަނީ އެ މައްސަލަ ރަޖިސްޓްރީ ނުކޮށްދީ ބޭރުކޮށްލައިފައެވެ.
މިކަމާއި ގުޅިގެން ކަންބޮޑުވުން ފާޅުކޮށް އެ ޕާޓީގެ ޕީޖީ ގުރޫޕުން ނޫސްވެރިންނާއި ބައްދަލުކޮށް ވަނީ، އިސްރާއީލު ޕާސްޕޯޓު މަނާ ނުކުރާތީ ހުރިހާ މެންބަރުންނަށް ފާޑުކިޔުން އަމާޒުވެފައިވާ ކަމަށާއި އެހެން ނަމަވެސް އެކަން އަވަހަށް ކުރެވޭނެ ގޮތެއް ހޯދުމުގެ މަސައްކަތް އެމްޑީޕީން ކުރަމުން އަންނަ ކަމަށެވެ.
އަދި ކުއްލި މައްސަލަ ބަލައި ނުގަތް ކަމުގަ ވިޔަސް ދެންވެސް މަޖިލީހުގެ ތެރެއިން ކުރެވެން ހުރި މަސައްކަތްތައް ބަލައި، އެކަމާ ގުޅޭ މަސައްކަތްތައް ކުރިއަށް ގެންދާނެ ކަމުގައި އެ ޕާޓީން ހާމަކުރިއެވެ.
އިސްރާއީލު ޕާސްޕޯޓް ބޭނުން ކުރުމުގެ މަސައްކަތްތައް ކުރިއަށް ނުގޮސް ލަސްވުމުގެ ސަބަބުން ސަރުކާރާއި މަޖިލިހަށް ގިނަ އާންމުންނެއް އަންނަނީ ފާޑުކިޔަމުންނެވެ. މި ފާޑުކިޔުންތައް އަމާޒުވެފައި ވަނިކޮށް ރައްޔިތުންގެ މަޖިލިހުގެ ސުޕަރމެޖޯރިޓީ ޕާޓީ ޕީއެންސީންވެސް ދާދި ފަހުން ވަނީ، އިސްރާއީލް ޕާސްޕޯޓް މަނާކުރުމުގެ މަސައްކަތް މަޖިލުހުގެ ތެރެއިން އަވަސްކުރުމަށް ގޮވައިލައިފައެވެ.
