ގުޅީފަޅު ކައިރީގައި ދެ ލޯންޗް ޖެހިގެން ރޭ ހިނގި ނުރައްކާތެރި އެކްސިޑެންޓްގައި އަނިޔާވެގެން އައިޖީއެމްއެޗަށް ފަރުވާއަށް ގެންދިޔަ މީހުންގެ ތެރެއިން 2 މީހަކަށް އިމަރޖެންސީގައި ފަރުވާދެމުން އަންނަ ކަމުގައި އެ ހޮސްޕިޓަލުން ބުނެފިއެވެ.
އެގޮތުން ހޮސްޕިޓަލުން ބުނި ގޮތުގައި ޖުމުލަ 20 މީހަކަށް މި އެކްސިޑެންޓްގައި އަނިޔާވެގެން ފަރުވާދިނުމަށް އެ ހޮސްޕިޓަލަށް ގެނެސްފައިވާކަމަށާއި މި އޭގެ ތެރެއިން ދެ މީހަކަށް އެމަޖެންސީގައި ފަރުވާދެމުން އަންނަ ކަމަށެވެ. އެހެން ނަމަވެސް އެމީހުނަށް ލިބުނު އަނިޔާތަކުގެ ތަފްސީލެއް އަދި ފަރުވާގެ ތަފްސީލެއް އެ ހޮސްޕިޓަލުން ހާމަކޮށްފައެއް ނުވެއެވެ.
މީގެ އިތުރުން އެ ހޮސްޕިޓަލުން ބުނެފައިވަނީ، އަނިޔާވި ބާކީ 18 މީހުނަނަށް މާ ސީރިއަސް އަނިޔާތަކެއް ލިބިފައި ނުވާކަމަށާއި އެ އެންމެނަށްވެސް ފަރުވާ ދިނުމަށް ފަހު ދޫކޮށްލައިފައި ވާކަމަށެވެ.
މައުލީމާތު ލިބޭ ގޮތުގައި އެކްސިޑެންޓުވެފައި ވަނީ ގްރޭންޑް ޕާކް ކޮއްދިއްޕަރު ޕީކޭޑީ-10 ކިޔާ ލޯންޗަކާއި ފެރިދޫ ޓުއާޒްގެ ސެނޯރާ ކިޔާ ލޯންޗެކެވެ.
ފުލުހުން ރޭ ހާމަކޮށްފައިވާ ގޮތުގައި ކްސިޑެންޓުގެ ރިޕޯޓު ފުލުހުންނަށް ލިބުނީ ރޭ 19:34 ހާއިރެވެ.
އެކްސިޑެންޓް ހިނގުމަށް މެދުވެރިވި ސަބަބެއް ފުލުހުން ހާމަކޮށްފައި ނުވާއިރު، ފުލުހުން ބުނީ އެ މައްސަލަ އިތުރަށް ތަޙުޤީގު ކުރަމުން އަންނަ ކަމަށެވެ.
