އައްޑޫގައި ޓޫރިޒަމަށް ހުރި ފުރުސަތުތަކާއި ގުޅުންހުރި މައުލޫމާތު ދިނުމަށް ޓޫރިޒަމް ސިމްޕޯޒިއަމެއް ބާއްވާނެ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެއެވެ.
އައްޑޫގެ ޓޫރިޒަމް ބްރޭންޑް ލޯންޗު ކުރުމަށް ރޭ ކެނަރީފް ރިސޯޓުގައި ބޭއްވި ރަސްމިއްޔާތުގައި ވާހަކަދައްކަވަމުން ފައިސަލް ވިދާޅުވީ، މިވަގުތު އެންމެ މުހިންމީ ޓޫރިޒަމަށް ހުރި ފުރުސަތުތަކަށް ރައްޔިތުންނަށް ހޭލުންތެރިކުރުވައި މިކަމުގައި ހުރި ފުރުސަތުތައް ޒުވާން ޖީލަށް ކިޔައިދިނުން ކަމަށެވެ.
އެގޮތުން، އަންނަ އަހަރު ތެރޭގައި އެކަމަށް އައްޑޫގައި ޓޫރިޒަމް ސިމްޕޯޒިއަމެއް ބާއްވާނެ ކަމަށާއި އެ ލީޑު ކުރާނީ އެމްއެމްޕީއާރްސީން ކަމަށް މިނިސްޓަރު ވިދާޅުވިއެވެ.
މީގެއިތުރުން، މިނިސްޓަރު ވިދާޅުވީ، މި ސިމްޕޯޒިއަމްގައި އިންޑިއާ އާއި ޗައިނާގެ ޓުއާ އޮޕަރޭޓަރުންނާއި އެއާލައިންތަކާއި އޮންލައިން ބުކިން ޕްލެޓްފޯމްތައް ބައިވެރިކުރާނެ ކަމަށެވެ.
“މިގޮތަށް މަސައްކަތް ކޮށްގެން ނޫނީއްޔާ ހަމަ ވަރަށް އުނދަގޫ ކަމަކަށް ވާނެ. އަޅުގަނޑު ގަބޫލުކުރަނީ މި މަސައްކަތް ވެގެން ދާނީ ވަރަށް މުހިންމު މަސައްކަތަކަށް ކަމަށޭ، މުގޮތަށް އެންމެން ނެޓްވޯކެއް ސެޝަނެއް ކުރިއަށް ގެންދެވިއްޖެއްޔާ،” ފައިސަލް
މިހާރު އައްޑޫގައި 1،100 އެނދު ހުރިކަން ފާހަގަކުރައްވައި ފައިސަލް ވިދާޅުވީ، ގަން އިންޓަނޭޝަނަލް އެއާޕޯޓު ހިންގުމުގެ ހިއްސާ އޮންނަ ކާސާ ހޯލްޑިންސް އިން އައްޑޫގައި އިތުރު 130 އެނދުގެ ޓޫރިސްޓު ހޮޓަލެއް ތަރައްޤީކުރަން ބޭނުންވާ ކަމަށާއި، އެކަން މަގުފަހިކުރަން ސަރުކާރުގެ ތެރެއިން ކުރަން ހުރި ކަންކަން ކުރަމުން އަންނަ ކަމަށެވެ.
