8 ރަށެއްގެ ކޯޓަށް މެޖިސްޓްރޭޓުން ހޯދުމަށް ޖުޑީޝަލް ސާވިސް ކޮމިޝަނުން އިއުލާންކޮށްފިއެވެ.
އެކޮމިޝަނުން މިއަދު އާއްމުކޮށްފައިވާ އިއުލާނެއްގައި ބުނެފައި ވަނީ، ހއ. ބާރަށާއި ނ. މާފަރާއި ބ. ކެންދު އާއި އެ އަތޮޅު ތުޅާދު އާއި ކ. ހިންމަފުއްޓާއި އެ އަތޮޅު، ކާށިދު އާއި ލ. މާވަށުގެ އިތުރުން ގދ. ގައްދޫ ކޯޓަށް މެޖިސްޓްރޭޓުން ހޯދާ ކަމަށެވެ.
އެކޮމިޝަނުން ހާމަކޮށްފައިވާ ގޮތުގައި މެޖިސްޓްރޭޓުންނަށް އަސާސީ މުސާރައިގެ ގޮތުގައި 26،350ރ. ލިބޭއިރު، އިތުރު އެލަވަންސްތަކާއިއެކު މަހަކު 40،00ރ. ރުފިޔާ އަށް ވުރެ ބޮޑު އަދަދެއް ލިބިވަޑައިގަންނަވާނެއެވެ.
މިމަޤާމަށް ކުރިމަތިލާ މީހުންގެ ކިބައިގައި ހުންނަން ޖެހޭ ޝަރުތުތަކުގެ ތެރޭގައި އުމުރުން 25 އަހަރު ފުރުމާއިއެކު، ޤާނޫނީ ދާއިރާއިން ޑިޕްލޮމާ ޙާސިލްކޮށްފައިވުމާއި ފަނޑިޔާރުކަމުގައި ނުވަތަ ޤާނޫނީ ވަކީލުކަމުގައި ނުވަތަ ޝަރުއީ ކޯޓެއްގެ ލީގަލް މަޤާމެއްގައި މަދުވެގެން ދެ އަހަރު ދުވަހުގެ ތަޖުރިބާ ލިބިފައިވުން ހިމެނެއެވެ.
އެހެންކަމުން މެޖިސްޓްރޭޓުން ހޯދަން އިއުލާންކުރި ރަށްތަކުގެ ކޯޓުތަކުގެ މެޖިސްޓްރޭޓުކަމަށް ޝައުޤުވެރިވެލައްވާ ފަރާތްތަކުން އަންނަ މަހުގެ 20 ގެ ކުރިން އެ މަޤާމުތަކަށް ކުރިމަތިލެއްވުމަށް އެކޮމިޝަނުން ވަނީ އެދިފައެވެ.
