ފުލުހުން ބަލަމުން އަންނަ މަކަރާއި ހީލަތުގެ މައްސަލައެއްގެ ތަޙުޤީގަށް ހާޒިރުކުރުމަށް ބޭނުންވާ އަންހެނަކު ހޯދުމަށް އިއުލާނުކޮށްފިއެވެ.
މި މައްސަލައާއި ގުޅިގެން ހޯދުމަށް ފުލުހުން އިއުލާނުކޮށްފައިވަނީ، އއ. މާޅޮސް، ބަނަފުސާގޭ އުމުރުން 41 އަހަރުގެ ހައްވާ ތަޢުލީމާއެވެ.
އެގޮތުން އޭނާ ހޯދަމުން އަންނަނީ މަކަރާއި ހީލަތުން މީހެއްގެ އަތުން ފައިސާ ހޯދާފައިވާކަމަށް ތުހުމަތުކުރެވޭ މައްސަލައެއްގެ ތަޙުޤީގަށް ހާޒިރުކޮށް ޒުވާލުކުރުމަށް ކަމުގައި ފުލުހުން ބުނެފައިވެއެވެ.
މީގެ އިތުރުން ފުލުހުން ބުނެފައި ވަނީ، ހުޅުމާލެ ފޭސް 1 ޕޮލިސް ސްޓޭޝަނުން ބަލަމުންދާ މި މައްސަލައިގައި އެ އަންހެން މީހާއަކީ އުޅޭ ވަކިތަނެއް ނޭނގުމުގެ ސަބަބުން ތަޙުޤީގަށް ހާޒިރުވުމަށް ޗިޓު ރައްދުކުރެވިފައި ނުވާ މީހެއްކަމަށެވެ.
އެގޮތުން ފުލުހުން އަމަލުކުރާނެ އިޖުރާޢަތުގެ ޤަވާއިދުގެ 27 ވަނަ މާއްދާގެ ދަށުން، އަންނަ މަހުގެ 6 ވަނަ ދުވަހުގެ 10:00ށް ހުޅުމާލޭ ފޭސް 1 ޕޮލިސް ސްޓޭޝަނަށް ހާޒިރުވުމަށް ފުލުހުން ވަނީ ހައްވާ ތަޢުލީމާއަށް އަންގައިފައެވެ.
