ދިވެހިންގެ ތެރޭގައި، ޚާއްސަކޮށް ޒުވާނުންގެ މެދުގައި އެކި ނަންނަމުގައި ބެޓްކޮށްގެން އޮންލައިންކޮށް ޖުވާކުޅުން ހުއްޓުވުމަށް ޤާނޫނުތަކަށް އިސްލާހު ގެންނާނެކަމަށް ބަންޑާރަ ނާއިބު އަޙުމަދު އުޝާމް މިއަދު ވިދާޅުވެއްޖެއެވެ.
ރައީސް އޮފީހުގައި މިއަދު ކުރިއަށް ދިޔަ ނޫސްވެރިންގެ ބައްދަލުވުމެއްގައި ބަންޑާރަ ނާއިބު ވިދާޅުވީ، އޮންލައިންކޮށް އެކި އެޕްލިކޭޝަންތަކާއި ވެބްސައިޓްތައް މެދުވެރިކޮށް ޒުވާނުންގެ މެދުގައި އޮންލައިން ބެޓިން ނުވަތަ އޮންލައިން ޖުވާކުޅުން އިންތިހާއަށް އިތުރުވެފައިވާކަމަށެވެ.
އެހެން ނަމަވެސް ކަންބޮޑުވާންޖެހޭ ވަރަށް އޮތް މި މައްސަލަ ހުއްޓުވުމަށް އެއްވެސް ޤާނޫނަކަށް މިހާތަނަށް އިސްލާހެއް ގެނެވިފައި ނުވާކަން ފާހަގަކުރައްވައި އުޝާމު ވިދާޅުވީ، އެކަން ހުއްޓުވުމަށްޓަކައި ޤާނޫނުތަކަށް ބަދަލުގެނައުމުގެ މަޝްވަރާތައް މިހާރު ކުރެވެމުން އަންނަ ކަމަށާއި އެކަން ތަންފީޒުކުރައްވާނެ ކަމަށެވެ.
އޮންލައިންކޮށް ޖުވާ ކުޅެ، ރާއްޖޭގައި ބައެއް މީހުން ގިނަ އަދަދެއްގެ ފައިސާ ވެސް ހޯދައެވެ. ގިނަ އަދަދެއްގެ ފައިސާ އިންވެސްޓްވެސް ކުރަން ޖެހޭ މި ކުޅިވަރުގެ މަސްތުގައި ޖެހި ގިނަ ބަޔަކު އެތަށް ބޮޑެތި އަދަދުތަކުން ފައިސާ އިސްރާފުކުރަމުން އަންނަ އިރު އަނެއް ބަޔަކު މި އަވައިގައި ޖެހިގެން ދަރަނީގެ ބޮޑެތި ދަންތުރަ ތަކުގައިވެސް އަންނަނީ ޖެހެމުންނެވެ.
އޮންލައިންކޮށް ޖުވާކުޅުމުގެ މައްސަލަ ބޮޑުވެފައިވަނިކޮށް، ޖުލައިމަހުގެ ތެރޭގައި ފުލުހުން ވަނީ އެ ފަދަ ހަތަރުވަރަކަށް ސައިޓު ބްލޮކް ކުރަން ކޮމިއުނިކޭޝަން އޮތޯރިޓީ އޮފް މޯލްޑިވްސް (ކޭމް)އަށް ހުށަހަޅައިފައެވެ. އެއާ އެކު އޭރު ބައެއް ސައިޓުތައް ބްލޮކް ވެސް ކުރިއެވެ.
