ދިވެހި ދައުލަތުން އަރުވާ، ނިޝާން އަސްކަރީގެ ވެރިކަމުގެ މޭޖަރ ޖެނެރަލް (ރިޓަޔަރޑް)ޢިއްޒަތް މޫސާ ޢަލީ ޖަލީލަށް އެރުވުމަށް ނިންމައިފިއެވެ.
މި ޢިއްޒަތް މޫސާ ޢަލީ ޖަލީލަށް އެރުވުމަށް ރައީސް ޑރ މުހައްމަދު މުއިއްޒު ނިންމެވިކަން ހާމަކޮށް ރައީސް އޮފީހުން ބުނެފައިވަނީ، ޤާނޫނުއަސާސީގެ 115 ވަނަ މާއްދާއިންނާއި، ދިވެހިރާއްޖޭގެ އިއްޒަތުގެ ޤާނޫނުގެ ދަށުން ރައީސުލްޖުމްހޫރިއްޔާއަށް ލިބިވަޑައިގަންނަވާ އިޚްތިޔާރުގެ ދަށުން ނިޝާން އަސްކަރީގެ ވެރިކަމުގެ މޭޖަރ ޖެނެރަލް (ރިޓަޔަރޑް)ޢިއްޒަތް މޫސާ ޢަލީ ޖަލީލަށް އެރުވުމަށް ރައީސް ނިންމަވައިފައި ވާކަމަށެވެ.
މި ޢިއްޒަތަކީ، ދިވެހި ޤައުމާއި ރައްޔިތުންގެ ސަލާމަތަށް ޓަކައި އަސްކަރީ ގޮތުން ކުރެއްވި އަގުހުރި ޚިދުމަތްތަކާއި، ޤައުމުގެ އިސްތިޤްލާލާއި ސިޔާދަތު ރައްކާތެރިކޮށް ދެމެހެއްޓުމަށް ކޮށްދެއްވި މަސައްކަތްޕުޅުތަކާއި މީގެ އިތުރުން، 1988 ނޮވެންބަރު މަހުގެ 3 ވަނަ ދުވަހު ރާއްޖެއަށް ކުރިމަތިވި ނުރައްކާތެރި އުދުވާނީ ހަމަލާއާ ގުޅިގެން، ދިވެހި ޤައުމާއި ރައްޔިތުންގެ ދިފާއުގައި ކުރެއްވި މަތިވެރި ޖިހާދުގެ އަގު ވަޒަންކުރެއްވުމުގެ ގޮތުން އެ ބޭފުޅާއަށް ރައީސް އަރުވާ ޣިއްޒަތެއްކަމުގައި ރައީސް އޮފީހުން ބުނެއެވެ.
އޭރުގެ ޓާސްކް ފޯސް އޮފިސަ އިން ޗާޖުގެ އެހީތެރިޔާގެ މަގާމުގައި ހުންނެވި އޭރުގެ ލެފްޓިނެންޓް މޫސާ އަލީ ޖަލީލަކީ، ނޮވެމްބަރު 3 ވަނަ ދުވަހު ތަމަޅަ ޓައިގަރުން ރާއްޖެއަށް ޙަމަލާދޭން ފެށުމާއެކު، ރައްދު ހަމަލާދޭން ފެށި ދިވެހި ސިފައިންގެ އެންމެ އިސް ސަފުގައި ހުންނެވި އެއް ބަޠަލެވެ.
އޭގެ ފަހުން މޫސާ ޢަލީ ޖަލީލު ވަނީ، ޑިފެންސް މިނިސްޓަރުގެ މަޤާމުގެ އިތުރުން ޗީފް އޮފް ޑިފެންސް ފޯސްކަން ވެސް ކުރައްވައިފައެވެ.
މޫސާ ޢަލީ ޖަލީލަށް ނިޝާން އަސްކަރީގެ ވެރިކަމުގެ ޢިއްޒަތް އެރުވުން އޮންނާނީ، މި އަހަރުގެ ނަޞްރުގެ ދުވަހުގެ މުނާސަބަތުގައި ބާއްވަވާ ރަސްމީ ޖަލްސާގައެވެ.
މި ޖަލްސާ ބޭއްވުމަށް ހަމަޖެހިފައިވަނީ، މާދަމާ ރޭ 8:30 ގައި ދަރުބާރުގޭގައެވެ.
