މިދިޔަ މަހު މޯލްޑިވްސް މީޑިޔާ ކައުންސިލުން ބޭއްވި ނޫސްވެރިކަމުގެ އެވޯޑްގެ މައްސަލައިގެ ތަހުޤީގަށް އެންޓި-ކޮރަޕްޝަން ކޮމިޝަނުގެ ފަރާތުން މީޑިޔާ ކައުންސިލް އޮފީހަށް ވަދެއްޖެއެވެ.
އެގޮތުން މިދިޔަ ބުދަ ދުވަހުގެ ރޭ ބޭއްވި މޯލްޑިވްސް މީޑިޔާ އެވޯޑްސްގައި މިދިޔަ ރިޔާސީ އިންތިޚާބުގެ ކެމްޕެއި ތެރޭގައި އަދަދު ނޫހުގެ ފަރާތުން ވީޑިއޯ ކެޓަގެރީން ތައްޔާރުކޮށްފައިވާ ރައީސް ޑރ މުހައްމަދު މުއިއްޒުގެ ދޮން މަންމާފުޅު، “ސްކީލާން” އާއި ގުޅޭ ރިޕޯޓަށް އެވޯޑް ލިބުމުގެ ސަބަބުން އެ މައްސަލަ ވަނީ ހޫނު ވެފައެވެ.
އެގޮތުން އެ އެވޯޑް ޙަފްލާގައި ޕީއެސްއެމްގެ އެޑިޓޯރިއަލް ޕޮލިސީއާ ޚިލާފު މަންޒަރުތަކެއް، ޗެނަލަށް ނާންގާ މީޑިއާ ކައުންސިލުން ދައްކައިފައިވާ ކަމަށް ބުނެ އެ މީޑިޔާ އިން ވަނީ މީޑިޔާ ކައުންސިލާއި ދެކޮޅަށް ބަޔާނެއް ނެރެފައެވެ. އަދި އެ މައްސަލައިގައިޕީއެސްއެމްގެ ވަޒީފާގަައި ހުންނެވި، މީޑިއާ ކައުންސިލުގެ ރައީސް އަހްމަދު މުސްތަފާ ވަޒީފާއިން ވެސް ވަކިކުރިއެވެ. ނަމަވެސް، ފަހުން ވަނީ އޭނާގެ ވަޒީފާ އިއާދަކޮށްފައެވެ.
މި މައްސަލަ ހޫނުވީފަހުން މި އަހަރުގެ އެވޯޑްގެ ފަނޑިޔާރުންގެ ޕެނަލްގައި ތިއްބެވި ފަނޑިޔާރުން ވަނީ، މިއަހަރުގެ އެވޯޑަށް މާކްސް ދިނުމުގައި ތަޙުޤީޤީ ނޫސްވެރިކަމުގެ ބަޔަށް މާކްސް ދެވޭ މިންވަރު ވަރަށް ބޮޑަށް އެ ބައި ހަނި ކޮށްފައިވާކަމަށް ވީދާޅުވެ ކަންބޮޑުވުން ފާޅުކޮށް ބަޔާނެއްވެސް ނެރެފައެވެ.
އެބަޔާނުގައި ފަނޑިޔާރުން ވިދާޅުވެފައި ވަނީ، އެކަމާ ގުޅޭގޮތުން ފަނޑިޔާރުން އުފެއްދި ސުވާލުތަކަށް ޒިންމާދާރުކަމާއެކު ޖަވާބުދާރީވެފައި ނެތް ކަމަށެވެ.
އަދި މީގެ ކުރިން އަހަރު ތަކުގައި ފަނޑިޔާރުން މާކްސް ދީ ނިމުމަށްފަހު ނަތީޖާތައް ހަވާލުކުރީ މިނިވަން އޮޑިޓް ފާމަކާ ކަމާއި މިފަހަރު އެކަން ވެސް ކޮށްފައިނުވާ ކަމަށް ފަނޑިޔާރުންގެ ބަޔާނުގައި ވިދާޅުވެފައިވެއެވެ.
