39ބާވަތަކުން ނަގަމުން އައި އިމްޕޯޓް ޑިއުޓީ ކަނޑާލައި 100 އަށް ވުރެ ގިނަ ބާވަތުގެ އިމްޕޯޓް ޑިއުޓީ ކުޑަވާ، މިނިވަން ވިޔަފާރީގެ އެއްބަސްވުމެއްގައި ދިވެހިރާއްޖެއިން ތުރުކީވިލާތާއެކު ސޮއިކޮށްފިއެވެ.
އެގޮތުން އިކޮނޮމިކް މިނިސްޓްރީން ހާމަކުރި ގޮތުގައި މި އެއްބަސްވުމުގެ ދަށުން ތުރުކީ ވިލާތަށް އެކްސްޕޯޓްކުރާ މަހުގެ ބާވަތްތަކަށް ލުއި ހޯދައިދިނުމުގެ އިތުރުން، ދެ ގައުމުގެ ދެމެދުގައި ވިޔަފާރީގެ ގުޅުން ވަރުގަދަ ކުރެވޭނެ ކަމަށެވެ.
ތުރުކީއާއެކު ވެވުނު މިނިވަން ވިޔަފާރީގެ އެއްބަސްވުމާއި ގުޅޭގޮތުން އިކޮނޮމިކް މިނިސްޓަރ އަޙްމަދު ސަޢީދު ވިދާޅުވީ، މި އެއްބަސްވުމުގެ ދަށުން ތުރުކީވިލާތަށް އެކްސްޕޯޓުކުރަމުންދާ، މަހުން އުފައްދާ މީގެ ކުރިން 60 އިންސައްތަ އިމްޕޯޓު ޑިއުޓީ ނަގަމުން އައި 39 ބާވަތެއްގެ އުފެއްދުމަކަށް ޑިއުޓީއެއް ނުނަގާނެކަމަށާއި 103 ބާވަތުގެ މަހުގެ އުފެއްދުންތައް ތުރުކީވިލާތަށް އިމްޕޯޓު ކުރުމުގައި ބޮޑެތި ލުއިތަކެއް ލިބިގެންދާނެ ކަމަށެވެ.
މީގެ އިތުރުން މި އެއްބަސްވުމުގެ ދަށުން ތުރުކީވިލާތުން ހެޔޮ އަގުގައި ދިވެހި ރައްޔިތުންނަށް މުދާ ލިބޭނެ ގޮތް ހަމަޖެހިގެންދާނެ ކަމަށާއި އެކްސްޕޯޓު އަދި ރިއެކްސްޕޯޓު ކުރުމުގެ ދާއިރާތަކުގެ އުފެއްދުންތެރިކަން ރާއްޖޭގައި އިތުރުކުރެވިގެން ދިއުމުގެ އިތުރުން މި އެއްބަސްވުމުގެ ދަށުން ވަޒީފާގެ ފުރުސަތުތައް އިތުރުވެގެން ދާނެ ކަމުގައި އިކޮނޮމިކް މިނިސްޓްރީން ބުނެއެވެ.
އަންނަ އަހަރުގެ ފުރަތަމަ ކުއާޓަރުގައި، ދެ ގައުމުގެ ސަރުކާރުން ކަނޑައަޅާ ތާރީޚެއް މި އެއްބަސްވުމަށް ޢަމަލުކުރަން ފެށުމަށް ހަމަޖެހިފައިވާއިރު، މިއީ މިދިޔަ އަހަރު ރައީސް ޑރ. މުހައްމަދު މުއިއްޒު ތުރުކީއަށް ކުރެއްވި ދަތުރުފުޅުގައި އެ ގައުމުގެ ރައީސް ރަޖަބް ޠައްޔިބް އުރުދުޣާނާ ބައްދަލުކުރައްވައި ނިންމެވި ކަންތައްތަކުގެ ތެރޭގައި ހިމެނޭ ކަމެކެވެ.
