“ޤައުމީ ކުޅިވަރު ފަންޑު”ގެ ނަމުގައި ފަންޑެއް ގާއިމުކުރެއްވުމަށް ރައީސް ޑރ. މުހައްމަދު މުއިއްޒު ނިންމަވައިފިއެވެ.
ކުޅިވަރުގެ ދާއިރާއާއި ކުޅިވަރު ކުޅޭ ކުޅުންތެރިންގެ ކުރިއެރުމާއި ކުޅިވަރާއި ގުޅުންހުރި ވަސީލަތްތައް ކުރިއެރުވުމަށްޓަކައި ޤާއިމްކުރާ މި ފަންޑް ޤާއިމްކުރެއްވުމަށް ރައީސް ޑރ މުހައްމަދު މުއިއްޒު ނިންމެވީ، އިއްޔެ ބޭއްވި ވަޒީރުންގެ މަޖިލިހުގެ ޖަލްސާގައި ވަޒީރުންގެ ލަފާފުޅާއެކުފައެވެ.
އެގޮތުން މި ފަންޑު ޤާއިމުކުރުމަށް ޤާނޫނު ނަންބަރު 30/2015 (ދިވެހިރާއްޖޭގެ ކުޅިވަރު ޤާނޫނު) އަށް ގެންނަވަންޖެހޭ ބަދަލުތައް ގެންނެވުމަށްޓަކައި، ކުރައްވަންޖެހިވަޑައިގަންނަވާ އެންމެހައި ކަންކަން ކުރެއްވުމަށްވެސް ހޯމަ ދުވަހު އޮތް ވަޒީރުންގެ މަޖިލީހުގެ ބައްދަލުވުމުގައި ވަނީ ނިންމަވައިފައެވެ.
މި ފަންޑް އެކުލަވައިލުމަށް ވަޒީރުންގެ މަޖިލީހުގެ ޖަލްސާއަށް ޚިޔާލު ހުށަހެޅުއްވީ، މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން ޢަބްދުﷲ ރާފިއުއެވެ.
މި ސަރުކާރުގައި ކުޅިވަރު ކުރިއެރުވުމަށާއި ކުޅުންތެރިން ބާރުވެރި ކުރުމަށް ކުރަންޖެހޭ އެންމެހައި ކަންކަން ކުރައްވާނެ ކަމުގެ ޔަޤީންކަން ރައީސުލްޖުމްހޫރިއްޔާ ޑރ މުހައްމަދު މުއިއްޒު ވަނީ މީގެ ކުރިން ވެސް އެކި ފަހަރުމަތިން ވިދާޅުވެފައެވެ.
