ހުޅުމާލެ ފަޅުތެރޭގައި އަޅާފައި އޮތް ސަފާރީއެއްގައި އަލިފާނުގެ ހާދިސާއެއް ހިނގައި އެ ސަފާރީ އެއްކޮށް ރޯވެއްޖެއެވެ.
މީސް މީިޑިޔާގައި ދައުރުވަމުން އަންނަ ވީޑިއޯއަކުން ފެންނަ ގޮތުގައި ހުޅުމާލޭ ދެވަނަ ފިޔަވަހި، އިންޓަރ ކަނެކްޓިންގް ބްރިޖް ސަރަހައްދުގައި ހުންނަ އެފްއެސްއެމްގެ ބޭރުގައި އަޅާފައި އޮތް މި ސަފާރީގައި އަލިފާން ރޯވެ އެ އަލިފާންގަނޑު މުޅި ސަފާރީގައި ހިފައި ވަރަށް ބޮޑަށް އަނދަމުން ގޮއްސައި ވެއެވެ.
މި ހާދިސާއާއި ގުޅިގެން އެމްއެންޑީއެފުން ބުނެފައިވަނީ، ހުޅުމާލެ ފަޅުތެރޭގައި އޮތް “ބުލޫވޭގާ” ނަމަކަށް ކިޔާ ސަފާރީއެއްގައި އަލިފާން ރޯވެގެން އުޅޭކަމުގެ މައުލޫމާތު ރޭ ފަތިހު 03:42 ހާއިރު އެ އިދާރާއަށް ލިބިފައި ވާކަމަށެވެ.
އެގޮތުން މި ހާދިސާ ހިނގައިގެން އުޅޭކަމުގެ މަޢުލޫމާތު ލިބުމާއެކު އެމްއެންޑީއެފް ފަޔަރ އެންޑް ރެސްކިޔު ސަރވިސްގެ ފަޔަރ ފައިޓަރުން، އެ ސަފާރީގައި ރޯވެފައިވާ އަލިފާންގަނޑު ނިއްވުމުގެ މަސައްކަތް ފަށައިފައިވާކަމަށެވެ.
އަދި މިހާރުވެސް އެ އަލިފާންގަނޑު ނިއްވުމުގެ މަސައްކަތް އެމްއެންޑީއެފުން ކުރަމުން އަންނަ ކަމަށާއި މި ހާދިސާގައި އެއްވެސް މީހަކަށް އަނިޔާއެއް ލިބިފައިވާ ކަމުގެ މަޢުލޫމާތު ލިބިފައި ނުވާކަމަށް އެ އިދާރާއިން ބުނެފައިވެއެވެ.
