ވެލާނާ އިންޓަނޭޝަނަލް އެއާޕޯޓު (ވީއައިއޭ)ގައި ޤާއިމްކުރި ހައިޑްރަންޓް ސިސްޓަމްއާއި ފިއުލް ފާމް މިއަދު ހުޅުވައިފިއެވެ.
މި ހައިޑްރަންޓް ސިސްޓަމްއާއި ފިއުލް ފާމް ރަސްމީކޮށް ހުޅުއްވައިދެއްވީ އެކަމަށްޓަކައި ވެލާނާ އިންޓަރނޭޝަނަލް އެއަރޕޯޓްގައި ބޭއްވި ޚާއްސަ ރަސްމިޔާތެއްގައި ރައީސް ޑރ. މުޙައްމަދު މުއިއްޒެވެ.
އެމްއޭސީއެލުން ވެލާނާ އިންޓަރނޭޝަނަލް އެއަރ ބޯޓަށް އޮޕަރޭޓްކުރާ ފަލައިޓްތަކަށް ތެޔޮ ފޯރުކޮށްދިނުމުގެ ގޮތުން ޤާއިމްކުރި މި ފިއުލް ފާމާއި ފިއުލް ހައިޑްރަންޓް ސިސްޓަމަކީ، 4 މިލިޔަން ލީޓަރުގެ ޖެޓް ފިއުލް ރައްކާކުރެވޭ ކެޕޭސިޓީއެއް އެކުލެވިގެންވާ ފިއުލް ފާމެކެވެ. އަދި މީގެ އިތުރުން 1 މިލިއަން ލީޓަރުގެ ޑީސަލާއި، 100،000 ލީޓަރުގެ ޕެޓްރޯލް ރައްކާކުރެވޭނެ ޖާގަވެސް މި ފިއުލްފާމްގައި ޤާއިމްކުރެވިފައިވެއެވެ.
އެގޮތުން 8.4 ކިލޯމީޓަރުގެ ދިގުމިނުގައި ބިމުގެ އަޑިން ޤާއިމްކޮށްފައިވާ މި ހައިޑްރެންޓް ސިސްޓަމަކީ ތެޔޮރައްކާކުރާ ހިސާބުން ފެށިގެން މަތިންދާބޯޓުތައް ޕާކުކުރާ ސަރަހައްދާ ހަމަޔަށް ތެޔޮ ފޯރުކޮށްދޭ ނިޒާމެއްކަމުން މި ނިޒާމުގެ ސަބަބުން ކޮންމެ މަތިންދާބޯޓު ސްޓޭންޑަކަށް ސީދާ ތެޔޮ ފޯރުކޮށްދީ، ފިއުލް ޓްރަކްތަކުން ދޫކުރާ ގޭސް މަދުކޮށް، ބިމުން ދުއްވާ އުޅަނދުތައް މަދުވެގެންދާނެ ކަމުގައި އެމްއޭސީއެލުން ބުނެއެވެ.
އަދި އާ ފިއުލް ހައިޑްރަންޓް ސިސްޓަމްގެ ސަބަބުން ރޭމްޕް އޮޕަރޭޓަރުންނަށް ފިއުލް ޑެލިވަރީ އާއި ސޭފްޓީގެ އެފިޝިއެންސީ ލިބިގެންދާނެ ކަމަށާއި އޮޕަރޭޝަނަލް ޓައިމް ވަރަށް ބޮޑަށް ކުޑަވެގެންދާނެ ކަމަށް އަދި ޚާއްސަކޮށް މި ނިޒާމް ބޭނުންކޮށްގެން އެއްފަހަރާ 7 ބޯޓަށް ތެޔޮ އެޅުމުގެ ޚިދުމަތް ދެވޭނެކަމަށްވެސް އެމްއޭސީއެލުން ހާމަކުރެއެވެ.
ޗައިނާގެ އެގްޒިމް ބޭންކުގެ ލޯނު އެހީގެ ދަށުން މޯލްޑިވްސް އެއާޕޯޓްސް ކޮންޕެނީ ލިމިޓެޑް (އެމްއޭސީއެލް) އިން ނިންމި މި މަޝްރޫއުގެ ދަށުން ޤާއިމްކުރި ފިއުލްފާމަށް ތެޔޮ ރިސީވްކޮށް، ޑިސްޓްރިބިއުޓްކުރުމާއި އޭގެ ސަލާމަތީ ކަންކަން ބެލުމުގެ އިތުރުން ހުރިހާ ކަމެއް ކުރަނީ އޮޓޮމޭޓެޑް ސިސްޓަމަކުން ކަމަށާއި އެ ޚިދުމަތްތައް ދިނުމުގައި މަސައްކަތް ކުރަނީ ހުސް ދިވެހިންކަމަށް އެމްއޭސީއެލްގެ މެނޭޖިން ޑިރެކްޓަރ އިބްރާހީމް ޝަރީފު ވިދާޅުވެއެވެ.
