65 އަހަރުންމަތީގެ ފަރާތްތަކަށް ސަރުކާރުން ދެމުން އަންނަ 5000ރ ގެ އިނާޔަތް ދިނުމުގެ އުސޫލަށް ބަދަލުތަކެއް ގެނެސް އެ އިނާޔަތް ދިނުމުގައި ފޯރުންތެރިކަމަށް ބަލައިގެން ދިނުމަށް ނިންމައިފިއެވެ.
2025 ވަނަ އަހަރަށް ލަފާކޮށް ރައްޔިތުންގެ މަޖިލިހަށް ހުށަހަޅައިފައިވާ ބަޖެޓް ފޮތުގައި ވަނީ، 65 އަހަރު ވެފައިވާ މީހުންނަށް 5،000ރގެ އިނާޔަތް ލިބޭނީ ފޯރުންތެރިކަމަށް ބަލައި، އެންމެ މަދުން އާމްދަނީ ލިބޭ މީހުންނަށް އެކަނި ކަމަށެވެ.
މި އުސޫލަށް އަމަލު ކުރަން ފަށާނީ އަންނަ އަހަރުގެ އޭޕްރީލް މަހުން ކަމަށާއި އިނާޔަތް ދިނުމުގެ އުސޫލަށް ބަދަލު ގެނައި ނަމަވެސް އޭޕްރީލް މަހާއި ހަމައަށް 65 އަހަރުން މަތީގެ ފަރާތްތަކަށް ދޭ އިނާޔަތް މިހާރުވެސް ދެމުން އަންނަ އުސޫލުން ދެމުން ގެންދާނެ ކަމަށް އެ އުސޫލުގައި ވަނީ ބުނެފައެވެ.
ދެމެހެއްޓެނިވި ގޮތެއްގައި ދައުލަތުން ޕެންޝަންގެ ގޮތުގައި ކުރާ ހަރަދުތައް ހިފެހެއްޓުމަށްޓަކައި އަޅަމުން އަންނަ އިސްލާހީ ފިޔަވަޅުތަކުގެ ތެރެއިން އަޅާ މި ފިޔަވަޅަށް އަމަލުކޮށް ފޯރުންތެރިކަމަށް ބަލައި ޕެންޝަން ދެމުން ގެންދާނީ އަންނަ އަހަރުގެ އޭޕްރީލް މަހުން ފެށިގެން 65 އަހަރުވާ ފަރާތްތަކަށް ކަމުގައި އެ ފޮތުގައި ބުނެފައިވެއެވެ.
“މި ބަދަލުގެ ސަބަބުން، އުމުރުން ދުވަސްވީ މީހުންނަށް ދެމުންދާ “ޔުނިވަރސަލް ބޭސިކް ޕެންޝަން” ބަދަލު ވެގެން ދާނީ “ޓާގެޓެޑް” ޕެންޝަންގެ އިނާޔަތަކަށެވެ. މި ބަދަލުގެ ސަބަބުން ދައުލަތުގެ ބަޖެޓުން ޕެންޝަން އިނާޔަތަށް ކުރާ ޚަރަދުތައް ވަކި މިންގަނޑެއްގައި ހިފެހެއްޓި، މަސައްކަތްތެރިންގެ މެދުގައި އެއްހަމަ ގޮތެއްގައި ކުރިއަށް އޮތް ތަނުގައި ތަންފީޒު ކުރެވިގެން ދާނެކަމަށް އެ ފޮތުގައި ބުނެފައިވެއެވެ.
އުމުރުން ދުވަސްވީ މީހުންގެ އިނާޔަތުގެ އިތުރުންވެސް މުވައްސާސާތަކުގެ މެދުގައި ދެމުންދާ އިނާޔާތްތަކުގައި ހުރި ފަރަގުތައް ނައްތާލައި އެއް ހަމަ އުސޫލެއްގެ ދަށުން މި އިނާޔަތް ދިނުމަށް ގެންނަން ޖެހޭ ބަދަލުތައް ގެނައުމުގެ މަސައްކަތް ކުރެވެމުންދާކަން ފާހަގަކޮށް ބަޖެޓް ފޮތުގައި އިތުރަށް ބުނެފައިވަނީ، އަލަށް ރިޓަޔަރވާ މީހުންނަށް އެއްހަމަ އުސޫލެއްގެ ދަށުން ޕެންޝަން އިނާޔާތްތައް ދިނުމަށްޓަކައި ގެންނަން ޖެހޭ ޤާނޫނީ ބަދަލުތައް އެކުލަވާލުމުގެ މަސައްކަތްތައްވެސް މިހާރު ކުރެވެމުންދާކަމަށެވެ.
އުމުރުން ދުވަސްވީ މީހުންނަށް އިނާޔަތެއް ދޭން އެންމެ ފުރަތަމަ ފެއްޓެވީ ކުރީގެ ރައީސް މުޙައްމަދު ނަޝީދުގެ ވެރިކަމުގައެވެ. އެއ އިނާޔަތް 5،000ރ. ބޮޑުކުރުމަށް ނިންމެވީ ކުރީގެ ރައީސް އަބްދުﷲ ޔާމީނުގެ ވެރިކަމުގައެވެ.
