250،000 ޑޮލަރުގެ ޑްރަގް ތައިލެންޑްގެ ވެރިރަށް ބެންކޮކަށް އެތެރެކުރި ދިވެއްސަކު ހައްޔަރުކޮށްފިއެވެ.
ބަރުދަނުގައި 2.9 ކިލޯގްރާމް ހުރި މި ތަކެތި ޕްރޮޓީން ޕައުޑަރުގެ ދަޅެއްގެ ތެރޭގައި ފޮރުވައިގެން އެތެރެކުރަން އުޅެނިކޮށް އޭނާ ހައްޔަރުކޮށްފައިވަނީ މި މަހުގެ 15 ވަނަ ދުވަހުކަމަށް ތައިލެންޑުގެ ނާކޮޓިކްސް ކޮންޓްރޯލް ބޯޑުން މަޢުލޫމާތުދެއެވެ.
އެގޮތުން އޭނާގެ އަތުން އަތުލައިގަނެވުނު މަސްތުވާތަކެތީގެ އަގު ގާތްގަނޑަކަށް 8.7 މިލިއަން ބާތުކަމަށް (ގާތްގަނޑަކަށް 250,000 އެމެރިކާ ޑޮލަރު) ނާކޮޓިކްސް ކޮންޓްރޯލް ބޯޑުންވަނީ ހާމަކޮށްފައެވެ.
އުމުރުން 29 އަހަރުގެ އެ މީހާ ހައްޔަރުކޮށްފައިވަނީ، ބެންކޮކުގެ ސުވަންނަބޫމީ ބައިނަލްއަޤްވާމީ ވައިގެ ބަނދަރުގައި ވައިގެ މަގުން އިނގިރޭސިވިލާތުން އައި ކުރިއާއެއް ބަލާގޮސް ހުއްޓައި ކަމަށް އެ ޤައުމުގެ ނާކޮޓިސް ބޯޑުން ހާމަކޮށްފައި ވާއިރު، އޭނާއާއި ގުޅޭ އިތުރު މައުލޫމާތެއް އެފަރާތުން ހާމަކޮށްފައެއް ނުވެއެވެ.
އެގޮތުން ތައިލެންޑުގެ ނާކޮޓިކްސް ކޮންޓްރޯލް ބޯޑުން މަޢުލޫމާތު ދީފައިވާ ގޮތުގައި އޭނާ މި މަސްތުވާތަކެތި ގެންދަން އުޅެފައިވަނީ އިންޑިއާގެ ބެންގަލޫރުއަށެވެ.
މި މައްސަލައާއި ގުޅިގެން މިކަމުގައި ބައިވެރިވުން އޮތް އިތުރު ދެ މީހަކު ހޯދަމުންދާ ކަމަށްވެސް ތައިލެންޑުގެ އިދާރާތަކުން ހާމަކުރެއެވެ.
މި މައްސަލައާ ގުޅިގެން ތައިލެންޑުގެ ނާކޮޓިކްސް ކޮންޓްރޯލް ބޯޑުން ވަނީ ތަޙުޤީޤު ފުޅާ ދާއިރާއެއްގައި ކުރިއަށް ގެންދާނެ ކަމަށް ބުނެފައެވެ. އަދި މިފަދަ ކުށްތަކާ ދެކޮޅަށް ހަރުކަށި ފިޔަވަޅު އަޅާނެ ކަމަށްވެސް އެ ބޯޑުން ބުނެފައިވެއެވެ.
