ދިވެހި ޤައުމިއްޔަތުގެ އިސްވަރުގެ އޮފީސް ހުޅުވައިފިއެވެ.
މި އޮފީސް ރަސްމީކޮށް ހުޅުއްވައިދެއްވީ އިއްޔެ ހަވީރު އެކަމަށްޓަކައި ބޭއްވި ރަސްމިޔާތެއްގައި ރައީސްގެ އަނބިކަނބަލުން ސާޖިދާ މުހައްމަދެވެ.
މި ރަސްމިޔާތުގައި އިސްވަރުގެ އޮފީހުގެ އިތުރުން ބަހާ ބެހޭ މިނިސްޓްރީން ފާއިތުވި އަހަރު ދުވަހުގެ ތެރޭގައި ކުރި މުހިންމު މަސައްކަތްތައް ހިމެނޭ ފޮތް، “ހިދުމަތުގެ 52 ހަފުތާގެ ފޮތް” ވެސް އެކަމަނާ ވަނީ އިފްތިތާޙް ކޮށްދެއްވައިފައެވެ.
ދިވެހި ޤައުމިޔަތުގެ އިސްވަރަކީ ޤައުމިއްޔަތު ދިރުވައި ޢާލާކުރުމަށް ސަރުކާރުން ކުރަމުން އަންނަ މަސައްކަތްތަކުގެ ތެރެއިން އެކި ދާއިރާތަކުން ކުރެވޭ ޤައުމީ ދިރާސާތައް ކުރުމަށް އެކުލަވައިލެވުނު ގުނަވަނެކެވެ.
އެ ކޮލެޖު އެކުލެވިގެންވަނި، 5 ދާއިރާއަކަށެވެ. އެއީ، ދިވެހިބަހާއި، ދިވެހި ތާރީޚާއި، ދިވެހި ސުމޭކާއި ދިވެހި ތަރިކައާއި ދިވެހި ފަންނެވެ. މި ދާއިރާތައް ހިމެނޭގޮތުން ކޮލެޖުގެ ކައުންސިލެއް އުފައްދާ ކޮންމެ ދާއިރާއަކަށް ޑީންއެއް ނުވަތަ އިސްވާރެއް ވަނީ އައްޔަންކުރައްވާފައެވެ.
ދިވެހި ގައުމިއްޔަތު އިސްވަރު ކައުންސިލުގެ އިސްވާރުން:
* ދިވެހި ބަހުގެ އިސްވާރު: މަރްޔަމް ތައުފީގާ
* ދިވެހި ތާރީހުގެ އިސްވާރު: އަލްއުސްތާޒު ކަށިމާ އަހުމަދު ޝާކިރު
* ދިވެހި ތަރިކައިގެ އިސްވާރު: ހަސަން ޒަރީރު
* ދިވެހި ސުމޭކުގެ އިސްވާރު: މުހައްމަދު އަބްދުލްގާދިރު
* ދިވެހި ފަންނުގެ އިސްވާރު: މަރްޔަމް އިޝާ އަޒީޒް
އިއްޔެގެ ރަސްމިޔާތުގެ ވަޒީރު އާދަމް ނަސީރު ވިދާޅުވީ ދިވެހި ގައުމިއްޔަތާ ގުޅުންހުރި ހުރިހާ އިދާރާތަކެއް ގުޅިގެން މަސައްކަތް ކުރާ ދާއިރާއަކަށް މި ދާއިރާ ބަދަލުވެގެން ދާނެ ކަމަށެވެ.
މީގެ އިތުރުން ކޮންމެ އަހަރަކު ބޮޑު ދެ ކޮންފަރެންސެއް ބޭއްވުމަކީ ވެސް ދިވެހި ގައުމިއްޔަތުގެ އިސްވަރުގެ ޒިންމާތަކުގެ ތެރޭގައި ހިމެނޭ ކަމެއްކަމުގައި މިނިސްޓަރ ފާހަގަކުރެއްވިއެވެ.
