ރާއްޖޭގައި ނުޤަވާއިދުން މަސައްކަތް ކުރަމުން އަންނަ ބިދޭސީންގެ މައްސަލަ ޙައްލުކުރުމަށް ކުރަމުން އަންނަ މަސައްކަތްތަކުގެ ތެރެއިން މާލެ ސަރަހައްދުގައި އަނެއްކާވެސް ބޮޑު ރެއިޑެއް ކުރިއަށް ގެންގޮސް 39 ބިދޭސީއަކު ހައްޔަރުކޮށްފިއެވެ.
އިމިގްރޭޝަނުން އިއްޔެ މާލޭގެ މަސް މާރުކޭޓު ސަރަޙައްދުގައި ކުރިއަށް ގެންދިޔަ މި ރެއިޑްގައި އެ ސަރަހައްދުގައި ބިދޭސީން ކޮންޓްރޯލް ކުރަމުން އަންނަ މަސްބޯޓުތައް ބަލައި ފާސްކޮށް ޖުމުލަ 39 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންދެވިފައިވާކަމަށް އެ އިދާރާއިން ބުނެއެވެ.
އިމިގްރޭޝަނުން ބުނީ، މި ރެއިޑަކީ، މަސް މާރުކޭޓު ސަރަހައްދުގައި ބިދޭސީން ވިޔަފާރިކޮށް ކޮންޓްރޯލް ކުރަމުންދިއަ މަސް ބޯޓުތަކާއި ގުޅިގެން ގިނަ ބަޔަކު ކަންބޮޑުވުން ފާޅުކުރަމުން ދިއުމާއި ގުޅިގެން ކުރިއަށް ގެންދިޔަ ރެއިޑެއް ކަމަށެވެ.
ރާއްޖޭގައި ބޮއްސުންލައިފައިވާ ބިދޭސީންގެ މައްސަލަތައް ޙައްލުކުރުމުގެ ގޮތުން މޯލްޑިވްސް އިމިގްރޭޝަނާއި މޯލްޑިވްސް ޕޮލިސް ސާވިސްއާއި އަދިވެސް ކަމާއި ގުޅުން ހުރި އެހެނިހެން އިދާރާތައް ގުޅިގެން ކުރިއަށް ގެންދާ އޮޕަރެޝަންތަކުގައި މިދިޔަ އަހަރުގެ ނޮވެމްބަރު މަހުގެ 17 ވަނަ ދުވަހުން ފެށިގެން ފާއިތުވެދިޔަ އެއް އަހަރު ތެރޭ ޤަވާއިދާ ޚިލާފަށް އުޅޭ 5012 ބިދޭސީން ރާއްޖެއިން ޑީޕޯޓްކޮށްލައިފައިވާކަމަށް ސަރުކާރުން ހާމަކުރެއެވެ.
