މިފްކޯގެ އައު ސީއީއޯއަކަށް ޔުކްރެއިން ބޭފުޅަކު އައްޔަންކޮށްފިއެވެ.
މުޅިން ފުރަތަމަފަހަރަށް މިފްކޯގެ ހިންގުން ބޭރު ފަރާތަކާއި ހަވާލުކުރި އިރު އެ ކުންފުނީގެ ސީއީއޯއަކަށް އައްޔަން ކުރީ ޑރ. ވިޓާލީ ލުބިމޯވްއެވެ.
އެ ބޭފުޅާއަކީ ސްޓްރެޓީޖިކް ކްރައިސިސް މެނޭޖްމެންޓުގެ ދާއިރާގެ ސްޕެޝަލިސްޓެކެވެ. ދާއިރާގައި ޖުމުލަ 20 އަހަރުގެ ތަޖުރިބާ ހުންނެވި ވިޓާލީ ލުބިމޯވް މިފްކޯގެ ސީއީއޯކަމަށް އައްޔަންކުރެއްވީ 4 އަހަރުގެ ދައުރަކަށެވެ.
ޕްރައިވަޓައިޒޭޝަން އެންޑް ކޯޕަރޭޝަން ބޯޑު (ޕީސީބީ) އިން މިފްކޯއަށް ސީއީއޯއަކު ހޯދުމަށް ކުރި އިއުލާނުގައިވާ ގޮތުން އެ މަޤާމުގެގެ މުސާރައިގެ ގޮތުގައި ކޮންމެ މަހަކު 12،000 ޑޮލަރު (185،040ރ.) އާއި 15،000 ޑޮލަރު (231،300ރ.) ދެމެދުގެ މުސާރައެއް ލިބޭނެއެވެ.
މިފްކޯގެ ސީއީއޯގެ މަޤާމުގައި އެންމެ ފަހުން ހުންނެވީ ސަމާހު ރަޝީދެވެ. އޭނަ އެ މަޤާމުން ވަކިކުރީ މި އަހަރުގެ މެއި މަހުގެ ތެރޭގައެވެ. އޭގެ ފަހުން މިފްކޯ އަށް ބިދޭސީ ސީއީއޯއެއް ހޯދަން އެންމެ ފުރަތަމަ އިއުލާންކުރީ ޖޫން މަހުގެ ތެރޭގައެވެ.
މިފްކޯއަށް ސީއީއޯއަކު ލިބިފައިވަނީ ބޭރު ސީއީއޯއަކު ހޯދަން ދެވަނަ ފަހަރަށް, ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ)ން އިއުލާނު ކުރިފަހުންނެވެ.
