ރާއްޖޭގައި ޤަވާއިދާއި ޚިލާފަށް މަސައްކަތް ކުރާ ބިދޭސީން އަތުލައިގަތުމަށް މޯލްޑިވްސް އިމިގްރޭޝަނުން ހިންގަމުން އަންނަ ޚާއްސަ ރެއިޑްގެ ދަށުން ހުޅުމާލެ ދެވަނަ ފިޔަވަހީގެ 13 ތަނެއް ބަލައި ފާސްކޮށް ޤަވާއިދާއި ޚިލާފަށް އުޅެމުން އައި 3 ބިދޭސީއެއް އިމިގްރޭޝަންގެ ބެލުމުގެ ދަށަށް ގެންގޮއްސިއެވެ.
އިމިގްރޭޝަނުން ހާާމަކުރި ގޮތުގައި އިއްޔެ ހިންގި އޮޕަރޭޝަންގައި ހިޔާ ފްލެޓުތަކުގައި ހިންގަމުންދާ އަށް ފިހާރަ، ހަތަރު ކެފޭ/ރެސްޓޯރަންޓް/ބޭކަރީ އަދި އެއް ސެލޫން ބަލައި ފާސްކޮށް ތަނެއްގައި ޤަވާއިދާ ޚިލާފަށް މަސައްކަތް ކުރަމުންދިޔަ ތިން މީހަކު ވަނީ އިމިގްރޭޝަންގެ ބެލުމުގެ ދަށަށް ވަނީ ގެންގޮއްސައެވެ.
އިމިގްރޭޝަނުން މިފަދަ އޮޕަރޭޝަންތައް ހިންގަމުންދަނީ ގަވާއިދާ ޚިލާފަށް ރާއްޖޭގައި އުޅޭ ބިދޭސީންގެ އަދަދު މަދުކުރުމަށް ކުރަމުންދާ މަސައްކަތުގެ ތެރެއިންނެވެ. މިފަދަ އޮޕަރޭޝަންތަކުގައި އަތުލައިގަނެވޭ ބިދޭސީން އާންމުގޮތެއްގައި ޑިޕޯޓްކުރެވެއެވެ.
މި ސަރުކާރުން ވެރިކަމާއި ހަވާލުވި ފަހުން އަންނަނީ ރާއްޖޭގައި ޤަވާއިދާ ޚިލާފަށް އުޅެމުން އަންނަ ބިދޭސީން ހޯދައި، އެމީހުންނާއި މެދު ފިޔަވަޅު އެޅުމުގެ މަސައްކަތް ފަށާފައެވެ. މި މަސައްކަތުގެ ތެރެއިން މިހާތަނަށް 5،000 އަށްވުރެ ގިނަ ބިދޭސީން ވަނީ ޑީޕޯޓް ކޮށްލާފައެވެ.
