ފެނަކައިގެ މެނޭޖިން ޑިރެކްޓަރު މުއާޒު މުޙައްމަދު ރަޝީދު މިއަދު އިސްތިއުފާ ދެއްވައިފިއެވެ.
އެގޮތުން އެ މަޤާމުން އިސްތިއުފާ ދެއްވައި ރައީސަށް ފޮނުއްވި ސިޓީގައި މުއާޒު ވިދާޅުވީ، ކުންފުނިތަކަކީ އުސޫލެއްގެ ގޮތުން ލިބޭ އާމްދަނީއަކުން އެ ކުންފުންޏެއް ހިންގުން ބައްޓަން ކުރަންޖެހޭ ތަންތަނަށް ވީ ނަމަވެސް ފެނަކަ ވެއްޓިފައިވާ މާލީ ހާލަތުން އެކަން އެގޮތަށް ކުރެވޭނެ މަގެއް ފެންނަން ނެތް ކަމަށެވެ.
އެގޮތުން ފެނަކައިން ފޯރުކޮށްދެމުން ހިދުމަތްތައް ފާއިތުވި އަހަރުތަކުގެ ތެރޭގައި އެކަށީގެންވާ ގޮތެއްގައި ނުބެލެހެއްޓުމުގެ ސަބަބުން ކުރިން އޮތް ބެކްލޮގް އެއްކޮށް ރަނގަޅު ކުރެވިފައި ނުވާކަމަށާއި ކުންފުންޏާއި ހަވާލުވިއިރު ކުންފުނީގެ ދަރަނީގެ ގޮތުގައި 4.3 ބިލިއަން ރުފިޔާ އޮތުމުގެ އިތުރުން ކުންފުންޏަށް ބޭނުންވާ އަދަދަށްވުރެ އެތައް ގުނައެއް އިތުރަށް ވަޒީފާ ހަމަޖައްސަން ޖެހުމާއި ކުންފުނި ރައިޓް ސައިޒް ކުރުމަށް އެކަށީގެންވާ އެއްވާރުލުމެއް ކަމާ ގުޅުންހުރި އިދާރާތަކުން ނުލިބުން އަދި ކުންފުންޏަށް ލިބޭ އާމްދަނީއަށްވުރެ ކުރަން ޖެހިފައިވާ ހަރަދު އިންތިހާއަށް އިތުރުވުން އެކަމުގެ ސަބަބެއްގެ ގޮތުގައި މުއާޒު ފާހަގަކުރެއްވިއެވެ.
މި ގޮންޖެހުންތަކާ އެކު ވެސް ފާއިތުވި 1 އަހަރު ދުވަހުގެ ތެރޭގައި ކުންފުނީގެ ހިންގުން ހަރުދަނާކޮށް، ހަރަދު ކުޑަކުރުމަށް ގިނަ މަސައްކަތްތަކެއް ކޮށްފައިވާކަން މުއާޒްގެ ސިޓީގައި ފާހަގަ ކުރެއްވިއެވެ.
މީގެ އިތުރުން އެ ސިޓީގައި ކުންފުނީގެ އުފެދިފައިވާ ދަރަންޏަށް ބަލާއިރު ހަމައެކަނި ހިންގުމުގެ ހަރަދު ކުޑަކޮށްގެން މިހާރު ވެއްޓިފައިިވާ ހާލަތުން ކުންފުނި ސަލާމަތް ނުކުރެވޭނެކަން ފާހަގަކުރައްވައި މުއާޒު ވަނީ، ފާއިތުވި އޮކްޓޯބަރު އަދި ނޮވެމްބަރު މަހުގެ މުސާރަ މުވައްޒަފުންނަށް މަސް ފެށުނުއިރު ވެސް ޖަމާކޮށްފައިވާ ނުވާ ކަމަށާއި މިއީ ފަހުގެ ތާރީޚެއްގައި އެ ކުންފުނީގައި ހިނގާފައިވާ ކަމެއް ނޫންކަން ފާހަގަކުރައްވައިފައެވެ.
އެގޮތުން ފެނަކަ އެމްޑީގެ މަގާމުން އިސްތިއުފާ ދެއްވަނީ ކުންފުންޏަށް ލިބޭ އާމްދަނީއަށް ވުރެ ކުރަންޖެހޭ ހަރަދު ބޮޑުވުމުން ދެމެހެއްޓެނެވި ގޮތެއްގައި ހިދުމަތް ފޯރުކޮށް ނުދެވޭނެ ހާލަތަކަށް ކުންފުނީގެ އޮޕަރޭޝަންގެ ހާލަތު ވެއްޓިފައިވުމުގެ ސަބަބުން އަދި ފެނަކައިގެ އެމްޑީގެ މަގާމުގައި ހުރެގެން އިތުރަށް މިކަން ރަނގަޅު ކުރެވޭނެ އަލިމަގެއް ފެންނަން ނެތުމުން ކަމަށް މުއާޒް ވަނީ ފާހަގަ ކުރައްވާފައެވެ.
