ސޯމާލިޔާގެ ބަޔަކު ކަމަށް ބެލެވޭ ބަޔަކާއެކު އޮޔާ ދިޔަ ޑިންގީއެއް ފުވައްމުލަކު ބޭރުން އަތުލައިގެންފިއެވެ.
އެމްއެންޑީއެފުން ބުނީ، ފުވައްމުލަކުގެ ހުޅަނގު އުތުރުން 10 ވަރަކަށް މޭލު ބޭރުން މި ޑިންގީ އަތުލައިގެންފައި ވަނީ، އެމްއެންޑީއެފްގެ ސަދަން ކޮމާންޑުގެ ކޯސްޓު ގާޑުގެ ފޯތު ސްކޮޑްރަންގެ ހާބާ ޕެޓްރޯލުންކަމަށެވެ.
އެގޮތުން އެ ޑިންގީ ފެނުނު ސަރަހައްދަށް ގޮސް ބެލިއިރު އެއީ ސޯމާލިއާގައި ގެންގުޅޭ ވައްތަރުގެ ‘ސްކިފް’އެއްކަން އެނގިފައިވާ ކަމަށާއި، އެ ޑިންގީގައި ސޯމާލިއާ މީހުން ކަމަށް ބެލެވޭ ތިން މީހަކު ތިބި ކަމަށް ސިފައިން ބުނެފައިވެއެވެ.
އެ މީހުން މިހާރު ވަނީ ކޯސްޓުގާޑުގެ ބެލުމުގެ ދަށުން ފުވައްމުލަކު ބަނދަރަށް ގެންގޮސްފައެވެ. ސިފައިން ބުނީ އެ މީހުން ފުލުހުންނާ ހަވާލުކުރުމަށް މަސައްކަތް ކުރާ ކަމަށެވެ.
މިދިޔަ ޖޫން މަހު ވެސް ސޯމާލިއާ ތިން މީހުން ތިބި ޑިންގީއެއް ރާއްޖެއަށް ލެއްގިއެވެ.
