ދިރުވާލައިގެން މަސްތުވާތަކެތި ރާއްޖެއަށް އެތެރެކުރަން މަސައްކަތް ކުރި ދެ މީހަކު ހައްޔަރުކޮށްފިއެވެ.
މި މައްސަލައިގައި ހައްޔަރުކޮށްފައިވަނީ ދިރުވާލައިގެން މަސްތުވާތަކެތި ރާއްޖެއަށް އެތެރެކުރަން މަސައްކަތް ކުރި ބްރެޒިލްގެ 44 އަހަރުގެ ފިރިހެނަކާއި އެ ތަކެއްޗާއި ހަވާލުވުމަށް އެއަރޕޯޓަށް ދިޔަ 39 އަހަރުގެ ދިވެހި ފިރިހެނެކެވެ.
ރާއްޖެއަށް މަސްތުވާތަކެތި އެތެރެކޮށް، ބޭނުންކޮށް، ގެންގުޅެ އަދި ވިޔަފާރި ކުރުމުގެ ކުށުގެ ދައުވާ އުފުލައިފައިވާ މި ދެމީހުންގެ ބަންދު އަމުރުގައި ކްރިމިނަލް ކޯޓުން ބުނެފައިވަނީ، މި މައްސަލައިގައި ހިމެނޭ ބިދޭސީ މީހާގެ ހަށިގަނޑު ތެރެއިން 107 ބުލެޓު ފެނިފައިވާކަމަށާއި އެތަކެތީގެ ބަރުދަނުގައި އެއް ކިލޯއަށް ވުރެ ގިނަ ތަކެތި ހުރި ކަމަށެވެ.
މި މައްސަލައިގައި ހައްޔަރުކުރި ދެ މީހުންގެ ބަންދުގެ މުއްދަތު ކަނޑައެޅުމަށް ކްރިމިނަލް ކޯޓަށް ހާޒިރުކުރުމުން، ދެ މީހުންވެސް ބުނެފައިވަނީ މައްސަލަ ކުރިއަށް ގެންދަން ބޭނުންވަނީ ވަކީލެއްގެ އެހީގައި ކަމަށެވެ.
މަސްތުވާތަކެތީގެ ވިޔަފާރި ހުއްޓުވުމަށް ފުލުހުންނާއި ކަސްޓަމްސްއިން ކުރަމުން އަންނަ މަސައްކަތުގެ ތެރެއިން މި ފަހުންވެސް އެކި އެކި ފަހަރުމަތިން ރާއްޖެއަށް މަސްތުވާތަކެތި އެތެރެކުރަން އުޅުނު ބިދޭސީންނާއި ދިވެހިން ވަނީ ހައްޔަރުކޮށްފައެވެ.
