ރައްޔިތުންގެ މަޖިލީސްގެ ރައީސް މުހައްމަދު ނަޝީދަށް ފިނޭންސް މިނިސްޓަރ އިބްރާހިމް އަމީރު ފޮނުވާފައިވާ ސިޓީގައި ވިދާޅުވެފައިވަނީ ބަލި ހާލަތު ހުރިގޮތުން މާދަމާ ތާވަލް ކޮއށްފައިވާ ބަޖެޓް ހުށައެޅުމުގެ ޖަލްސާއަށް ހާޒިރުވާން އުޒުރުވެރިވާކަމަށެވެ.
މިދިޔަ މަހުގެ 31ގައި ވެސް ދެ ބަޖެޓް މަސައްކަތްވަނީ މަޖިލީހުގައި އެޖެންޑާ ކުރެވިފައިއެވެ. ނަމަވެސް ނަޝީދު ވަކިކުރުމުގެ ގަރާރާއ މެދު ގޮތެއް ނުނިންމައި، މަޖިލީހުގެ އިތުރު މަސައްކަތެއް ނުކުރެވޭނެ ކަމަށް ބުނެ އެމްޑީޕީން ވަނީ ޖަލްސާއަށް ހުރަސްއަޅައި، ހުއްޓުވައިފަ އެވެ. ބަންޑާރަ ނައިބުގެ ލަފާގެ މަތިން ފިނޭންސް މިނިސްޓަރު އިބްރާހިމް އަމީރު އެ ދުވަހުގެ ޖަލްސާއަށް ވަޑައެއްނުގަންނަވަ އެވެ.
މާދަމާ މަޖިލީހުގެ ދެ ޖަލްސާއެއް ތާވަލްކޮއްފައިވެއެވެ. 9 ޖަހާއިރު އަންނަ އަހަރުގެ ބަޖެޓާއި ސަޕްލިމަންޓްރީ ބަޖެޓު ހުށަހެޅުމުގެ ޖަލްސާ އަދި 11 ޖަހާއިރަށް ތާވަލްކޮށްފައިވާ ނަޝީދު ވަކިކުރުމުގެ ގަރާރާއި ބެހޭ ޖަލްސާއެވެ.
