ގިނަ އަހަރުތަކެއް ވަންދެން މިނިވަން މުއައްސަސާތަކުގެ ޝަކުވާއަކަށްވެފައިވަނީ ޒިންމާ އަދާކުރުމަށް އެ މުއައްސަސާއަށް ދޭ ބަޖެޓުން މަސައަކަތް ކުރުމަށް ދަތިވާ ވާހަކައެވެ. ބަޖެޓު ކޮމިޓީން ވަނީ ދިރާސާ މަރުހަލާގައި މި ކަންކަން ބަލައި އަންނަ އަހަރުގެ ބަޖެޓުގައި މުއައްސަސާތަކަށް ދޭ ބަޖެޓްވަނީ ބޮޑުކޮއްފައިވެއެވެ.
މި ބަދަލުތަކުގެ ތެރޭގައި ކްރިމިނަލް ކޯޓް ހުޅުމާލެ ބަދަލުކުރުމަށް ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަންގެ ބަޖެޓަށް 15 މިލިޔަން އިތުރުކުރުމާއި, ހައިކޯޓު ޕެރަލީގަލް މަސައްކަތަށް 2.2 މިލިއަން ރުފިޔާ އަދި މަދަނީ އިޖުރާއަތުގެ ކޯޑު ތަންފީޒުކުރަން 500،000ރ. ހިމެނެއެވެ. މި ބަދަލާއި އެކުގައި ޑިޕާޓްމެންޓް އޮފް ޖުޑީޝަލް އެޑްމިނިސްޓްރޭޝަންގެ ބަޖެޓަ ވަނީ 585.8 މިލިއަން ރުފިޔާއަށް ބޮޑުވެފައިއެވެ.
ރައްޔިތުންގެ މަޖިލީހުގެ ޕާލިމެންޓަރީ ސާވިސްގެ މުވައްޒަފުންނަށް ހާއްސަ އެލަވަންސްއެއްގެ ގޮތުގައި އަސާސީ މުސާރައިގެ 20 ޕަސެންޓު އެލަވަންސެއްގެ ގޮތުގައި ދިނުމަށް 4.7 މިލިއަން ރުފިޔާ އިތުރުކޮއްފައިވެއެވެ. އަދި މުވައްޒަފުންނަށް މަތީ ތައުލީމުގެ އެލަވަންސް ދިނުމަށް 508،200ރ. އާއި މުވައްޒަފުންނަށް ހެލްތު އިންޝުއަރެންސް ދިނުމަށް 685،000ރ. ވެސް ހިމަނާފައިވެއެވެ.
އިންފޮމޭޝަން ކޮމިޝަނަރުގެ އޮފީހަށް 1.6 މިލިއަން ރުފިޔާ އިތުރުކޮށްފައިވާ އިރުގައި, ސިވިލް ސާވިސް ސާވިސްގެ ތަފާސްހިސާބު ޑޭޓާބޭސްއެއް ގާއިމުކުރުމަށާއި ހައިބްރިޑް އެޑްވާންސް ޓްރޭނިން ދިނުމަށް އެ އޮފީހުގެ ބަޖެޓަށް އެއް މިލިއަން ރުފިޔާ އިތުރުކޮއްފައިވެއެވެ.
މީގެ އިތުރުން މޮރިޝަސް ކަނޑުގެ މައްސަލަ އަލުން ހުށަހެޅުމަށްޓަކައި ކުރަންޖެހޭ ގާނޫނީ މަސައްކަތް ކުރުމަށް 10 މިލިއަން ރުފިޔާ ވެސް ބަޖެޓުގައި ހިމަނާފައިވެއެވެ.
ބައެއް މުއައްސަސާތަކަށް ބަޖެޓު އިތުރު ކުރި މިންވަރު
- ބްރޯޑްކާސްޓިން ކޮމިޝަން: 351,070ރ
- ޗިލްޑިރަންސް އޮމްބަޑްސްޕާސަންސް އޮފީސް: 400,000ރ
- ނެޝަނަލް އިންޓެގްރިޓީ ކޮމިޝަން: 825,000ރ
- ފެމެލީ ޕްރޮޓެކްޝަން އޮތޯރިޓީ: 900,000ރ
- ޕްރޮސިކިއުޓާ ޖެނެރަލް އޮފީސް: 980,183ރ
- ޓެކްސް އެޕީލް ޓްރައިބިއުނަލް: 1.8 މިލިއަން ރުފިޔާ
- އެމްޕްލޯއިމަންޓު ޓްރައިބިއުނަލް: 2.1 މިލިއަން ރުފިޔާ
- މީރާ: 2.2 މިލިއަން ރުފިޔާ
- އިސްލާމިކް ޔުނިވާސިޓީ: 5 މިލިއަން ރުފިޔާ
މިބަދަލުތަކާއި އެކު 2024 ވަނަ އަހަރުގެ ބަޖެޓު ވަނީ 49.5 ބިލިއަން ރުފިޔާއިން 49.80 ބިލިއަން ރުފިޔާއަށް ބޮޑުވެފައިއެވެ.
