ސާނަވީ އިމްތިހާން ނިންމާކުދިން އަދި މަތީ ސާނަވީގައި ކިޔަވަމުންދާ ދަރިވަރުންނަށް އިމާމުވެ ހުކުރުކޮށް އަދި ޚުތުބާ ކިޔުމުގެ ހުއްދަ ދިނުމަށް މިނިސްޓްރީ އޮފް އިސްލާމިކް އެފެއާޒް އިން ނިންމައިފިއެވެ.
މިނިސްޓަރ އޮފް އިސްލާމިކް އެފެއާޒް ޑރ. މުޙައްމަދު ޝަހީމް އަލީ ސަޢީދު މިއަދު ކުރެއްވި ޓްވީޓެއްގައި އިސްލާމިކް މިނިސްޓްރީގެ ނިންމުން ވަނީ ހާމަކުރައްވާފައެވެ. ގްރޭޑް 10، 11 އަދި 12 ގެ ދަރިވަރުންގެ ތެރެއިން ރީތިކޮށް ތަޖުވީދުމަގަށް ޤުރުއާން ކިޔަވައި، ނަމާދުގެ ފިޤުހަށް އަހުލުވެރި ދަރިވަރުންނަށް އިމާމުކަމާއި ޚަތީބުކަމުގެ ހުއްދަ ދޭން ނިންމާފައިވާކަމަށް މިނިސްޓަރުގެ ޓްވީޓުގައި ބަޔާންކޮށްފައިވެއެވެ.
ދިވެހިރާއްޖޭގައި ހުކުރު ކުރުމުގެ ހުއްދަ ދެމުން އައިސްފައިވަނީ އެކަމާގުޅޭ ޚާއްސަ ކުރުކޯހެއް ނިންމުމަށްފަހު ސަނަދެއް ހާސިލްކުރުމުންނެވެ. އިސްލާމިކް މިނިސްޓްރީގެ މިނިންމުމުގެ ސަބަބުން ޝައުޤުވެރިކަން ހުންނަ ޒުވާނުންނަށް އިމާމުކަމާއި ޚަތީބުކަން ކުރުމަށް ފުރުސަތު ހުޅުވިގެން ދާނެއެވެ.
އިސްލާމިކް މިނިސްޓްރީއާއި ޑރ. މުޙައްމަދު ޝަހީމް އަލީ ސަޢީދު ހަވާލުވެލެއްވި ފަހުން ގިނަ ކަންތައްތަކެއް ދަނީ ބަދަލުކުރައްވަމުންނެވެ. މިގޮތުން ޚުތުބާގެ އިނގިރޭސި ސަބްޓައިޓަލް ލައިވްކޮށް ޓީވީއިން ދެއްކުމާއި އިނގިރޭސިއާއި އެހެނިހެން ބަސްބަހުން ޚުތުބާގެ ތަރުޖަމާ ލިބޭނެގޮތް ހަމަޖެއްސުމަށްވެސް މިނިސްޓްރީއިން ވަނީ ނިންމާފައެވެ.
