ރައްޔިތުންގެ މަޖިލީހުގެ ކުރީގެ ރައީސް މުޙައްމަދު ނަޝީދު ދިވެހިރާއްޖޭގެ ސިޔާސީ މައިދާނާއި ދުރަށް ޖެހިލައްވައި އެކަން އިޢުލާން ކުރައްވައިފިއެވެ.
ރައްޔިތުންގެ މަޖިލީހުގެ މިހާރުގެ މައްޗަންގޮޅި ދާއިރާގެ މެންބަރު އަދި 2008 އިން 2012 ގެ ފެބްރުއަރީއާއި ހަމައަށް ރާއްޖޭގެ ރައީސްކަން ކުރެއްވި މުޙައްމަދު ނަޝީދު ރާއްޖޭގެ ސިޔާސީ ދާއިރާއިން ދުރަށްޖެހިލައްވާކަން އިޢުލާންކުރެއްވީ މިއަދު އެމަނިކުފާނުގެ އޮފީހުން ނެރުއްވި ބަޔާނެއްގައެވެ. ކުރިއަށް އޮތް ރައްޔިތުންގެ މަޖިލީހުގެ އިންތިޚާބުގައި ވާދަނުކުރައްވާނެކަން ރައީސް ނަޝީދު ވަނީ ކުރިންވެސް އިޢުލާން ކުރައްވާފައެވެ.
2009 ވަނައަހަރު ރާއްޖެއާއި އިތުރު 11 ޤައުމެއް ގުޅިގެން އުފެއްދި “ކްލައިމެޓް ވަލްނަރަބަލް ފޯރަމް” ގެ ސެކެޓްރީ ޖެނެރަލްގެ މަޤާމާއި ހަވާލުވުމަށް ރައީސް ނަޝީދު ނިންމަވާފައިވާކަމަށާއި އެކަން އެޖަމިއްޔާއަށް އަންގަވާފައިވާކަމަށްވެސް އެމަނިކުފާނުގެ ބާޔަނުގައި ބުނެފައިވެއެވެ.
ރާއްޖޭގެ ސިޔާސީ މަޝްރަޙުގެ އެންމެ ވަރުގަދަ އެއް ބޭފުޅަކީ ރައީސް ނަޝީދެވެ. މައުމޫން އަބްދުލްޤައްޔޫމްގެ ދިގު 30 އަހަރުގެ ވެރިކަން ނިމުމަކަށް ގެނައުމުގައި ރައީސް ނަޝީދާއި އޭނާ އިސްކޮށް އުޅުއްވި ޕާޓީ، އެމްޑީޕީގެ ދައުރު ވަރަށް ބޮޑެވެ. ރައީސް ނަޝީދު ވަނީ ރާއްޖޭގެ ރައީސްކަން އަދި ރައްޔިތުންގެ މަޖިލިސް ރައީސްކަންވެސް ކުރައްވާފައެވެ. އެމްޑީޕީއާއި ޖެހުނު މައްސަލަތަކެއްގައި ރައީސް ނަޝީދު ވަނީ އަމިއްލަ އިސްނެންގެވުމަށް “ދަ ޑިމޮކްރެޓްސް” ނަމުގައި އާޕާޓީއެއް އުފައްދަވާފައެވެ.
