ރައީސުލްޖުމްހޫރިއްޔާ އަދި ރައީސުލްޖުމްހޫރިއްޔާގެ ނައިބު މަޤާމުން އަޒުލުކުރުމާބެހޭ ކަންކަމަށް މަޖިލީހުން ގެންނަން އުޅޭ އިސްލާޙަކީ ރާއްޖޭގެ ޤާނޫނު އަސާސީއާއި ޚިލާފް ބަދަލެއް ކަމަށް ފިޝަރީޒް މިނިސްޓަރ އަދި ކުރީގެ ނައިފަރު ދާއިރާގެ މަޖިލިސް މެންބަރު އަހުމަދު ޝިޔާމް ވިދާޅުވެއްޖެއެވެ.
ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެންބަރު އަލީ އާޒިމް ހުށަހެޅުއްވި އިސްލާޙުގައި ވާގޮތުން ރައްޔިތުންގެ މަޖިލީހުގެ މެންބަރުކަން އެއްވެސް ސަބަބަކާއި ހުރެ ގެއްލިއްޖެނަމަ އެދާއިރާގެ ގޮނޑި، މަޖިލީހުގެ މެންބަރުންގެ ޖުމްލަ އަދަދު ކަނޑައެޅުމުގައި ނުގުނޭނެއެވެ. މިގޮތަށް އިސްލާޙު ފާސްވެއްޖެނަމަ އިދިކޮޅު އެމްޑީޕީގެ 55 މެންބަރުންގެ ވޯޓުން އެކަނިވެސް ރައީސުލްޖުމްހޫރިއްޔާ މަޤާމުން ވަކިކުރުމުގެ ފުރުސަތު ހުޅުވުނީއެވެ.
ޤާނޫނީ މާޙިރުން ވިދާޅުވަނީ މިގޮތަށް އިސްލާޙު ގެނައުމުން ގޮނޑި ހުސްވެފައިވާ ދާއިރާތަކުގެ ރައްޔިތުން ޙައްޤު ގެއްލިގެންދާނެއެވެ. އަދި މިއިސްލާޙަކީ “ބަޤާވާތެއް” ގެ ފެށުންކަމަށްވެސް ޤާނޫނީ މާޙިރުން ދެކެއެވެ. އެހެނީ ރައްޔިތުންގެ މަޖިލީހުގެ ސުޕަމެޖޯރިޓީ އޮތް މޯލްޑިވިއަން ޑިމޮކްރެޓިކް ޕާޓީ އިން ބޭނުންވެއްޖެ ހިނދެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަޤާމުން ވަކިކުރުމުގެ ބާރު އެޕާޓީއަށް ލިބިގެންދާނެތީއެވެ.
