ފުލުހުން ޓޯކުރި ސައިކަލެއް އޮޅިގެން ނައްތާލެވިފައިވާތީ ސައިކަލުގެ ވެރިފަރާތަށް -/82،000 ގެ ބަދަލެއް ދޭން ފުލުހުންގެ މައްޗަށް ސިވިލް ކޯޓުން މިއަދު ހުކުމްކޮށްފި އެވެ.
އޭޕްރީލް، 2022 ގައި ހުޅުމާލޭގައި ހިނގި އެކްސިޑެންޓަކާ ގުޅިގެން ފުލުހުން ޓޯކޮށްފައިވާ ސައިކަލެއް ހުޅުމާލޭ ޓޯ ޔާޑުގައި ހުއްޓާ ގެއްލިފައިވާ ކަމަށް ފުލުހުންގެ ފަރާތުން މައުލޫމާތު ލިބުމުން ސައިކަލުގެ ވެރިފަރާތުން ފުލުހުންނާ ދެކޮޅަށް ދައުވާކުރީ ގެއްލުމުގެ ބަދަލު ހޯދުމަށެވެ.
ކޯޓުގައި ދައުލަތުން ވަނީ އެ ސައިކަލު އޮޅިގެން ނައްތާލެވިފައިވާ ކަމަށް ބުނެފަ އެވެ.
ކޯޓުގެ ހުކުމުގައިވަނީ ސައިކަލުގެ އަގު ކަމަށްވާ -/57،000 އާއި ސައިކަލުގެ ވެރިފަރާތުން އެ މައްސަލާގައި ވަކީލަށް ހަރަދު ކުރަން ޖެހުނު 25،000ރ. އާ އެކު ޖުމްލަ 82،000ރ. ދައުލަތުން އެ މީހާއަށް ދައްކަން ޖެހޭނެ ކަމަށެވެ. ހަމަ އެހެންމެ އެ ފައިސާ ހަތް ދުވަސް ތެރޭގައި ދެއްކުމަށް ވެސް އެ ހުކުމުގައި އަންގާފައިވެއެވެ.
އެ މައްސަލާގައި ޕިއުނިޓިވް ޑެމޭޖަސްގެ ގޮތުގައި -/19،000 ނަގައިދިނުމަށް އެދިފައިވީ ނަމަވެސް ކޯޓުގެ ހުކުމުގައިވަނީ އެ ފައިސާ ނަގައި ނުދެވޭނެ ކަމަށެވެ. ސަބަބަކީ އެ ބާވަތުގެ ބަދަލަކީ ގަސްދުގައި ކުރާ ކަންކަމަށް ނަގައިދޭ ބަދަލެއް ކަމަށްވެފައި، އެ މައްސަލާގައި ސައިކަލު ނައްތާލެވުނީ އޮޅިގެން ކަމަށް ވާތީ ކަމަށް ހުކުމުގައިވެ އެވެ.
