ރައްޔިތުންގެ މަޖިލީހުގައި ސަރުކާރުގައި ޖަވާބުދާރީ ކުރުވުމުގެ މަސައްކަތް ދެ ޕާޓީން ގުޅިގެން ކުރަން އެމްޑީޕީއާއި ދަ ޑިމޮކްރެޓްސްއިން އެއްބަސްވެއްޖެއެވެ.
އެ ދެ ޕާޓީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވީ، މި ސަރުކާރުގެ ޚާރިޖީ ސިޔާސަތާއި އިގުތިސާދީ ކަންކަމާއި އެ ނޫން ވެސް ކަންކަމުގެ ސަބަބުން ބޮޑެތި ކަންބޮޑުވުންތަކެއް އެބަހުރި ކަމަށާއި އެހެންކަމުން، ޒިންމާދާރުކަމާ އެކު ސަރުކާރު ޖަވާބުދާރީ ކުރުވަން ދެ ޕާޓީ ގުޅިގެން މަޖިލީހުގައި މަސައްކަތް ކުރަން އެއްބަސްވެފައިވާ ކަމަށެވެ.
ބޭރުގެ ގައުމުތަކުގައި ވެސް ހަނގުރާމަތައް ކުރަމުން އަންނަކަން ފާހަގަކުރައްވައި ފައްޔާޒު ވިދާޅުވީ، އިންޑިއާ ކަނޑުގެ ހަމަޖެހުން ގެއްލޭ ފަދަ ކަންކަން މި ސަރުކާރުން ކުރަމުން އަންނަ ކަމަށެވެ.
އެފަދަ ކަންބޮޑުވުންތައް ހުރުމުގެ ސަބަބުން، ދެ ޕާޓީން ގުޅިގެން މަޖިލީހުގައި ސަރުކާރު ޖަވާބުދާރީ ކުރުވުމުގެ މަސައްކަތް ކުރަން އެއްބަސްވީ ކަމަށް ވެސް އެބޭފުޅާވަނީ ވިދާޅުވެފައިއެވެ.
