މިއަހަރުގެ ހައްޖުގެ އަޅުކަން ކުރާ ދުވަސްކޮޅުގައި މައްކާ އަދި މަދީނާގެ ސަރަހައްދުގައި އިންތިހާއަށް ހޫނުގަދަވާނެ ކަމަށް ސައުދީ ނޭޝަނަލް ސެންޓަރ ފޯ މީޓިއޮރޮލޮޖީން ލަފާކޮށްފިއެވެ.
އަންގާރަ ދުވަހު އެ ސެންޓަރުން އިއުލާން ކޮށްފައިވަނީ ހައްޖުގެ ދުވަސްކޮޅު އެސަރަހައްދުތަކުގެ ހޫނުމިން 48 ޑިގްރީއަށް އަރާނެ ކަމަށް ލަފާކުރެވޭ ކަމަށާއި, ސަހަރާތަކާއި ހައިވޭ ތަކުގައި ވެލީގެ ތޫފާންތަށް އައުންވެސް އެކަށީގެންވާ ކަމުގައެވެ.
މީގެ އިތުރުން އެދުވަސްވަރު ވާރޭ ވެހުމުގެ ފުރުސަތު ކުޑަ ނަމަވެސް ތާއިފްގެ އުސްބިންތަކުގައި އުފެދިދާނެ ވިއްސާރަ ވިލާތަކުގެ އަސަރު މައްކާއަށް ކޮށްފާނެ ކަމުގެ ފުރުސަތު އޮވެދާނެކަމަށް އެ ސެންޓަރުން ހާމަކޮށްފައިވެއެވެ. މައްކާ, މަދީނާއާއި، އެއާޕޯޓްތަކާއި އަދި މައި މަގުތަކުގައި 24 ގަޑިއިރު މޫސުން މޮނިޓަރ ކުރުމުގެ އިންތިޒާމް އެ ސެންޓަރުން ހަމަޖައްސައިފައިވެއެވެ.
މި އަހަރުގެ ހައްޖުގެ އަޅުކަން އަދާކުރުމަށް އަންނަ ހައްޖުވެރިންނަށް ގަދަ ހޫނުން ސަލާމަތްވުމަށް ގިނަގިނައިން ފެން ބުއިމާއި، ކުޑަ ބޭނުންކުރުމާއި، ޚާއްސަކޮށް މެންދުރުގެ ވަގުތުގައި ސީދާ އަތްވަށް ނުނިކުތުމަށް އެ އިދާރާއިން އިލްތިމާސްކޮށްފައިވެއެވެ.
