ހޮނިހިރު ދުވަހު އިޒްރާއިލުން ފަލަސްތީނުގެ ޣައްޒާއަށް ދިން އިތުރު ހަމަލާތަކެއްގައި އެރަށުގެ 42 މީހަކު މަރުވެއްޖެއެވެ.
ފަލަސްތީނުގެ ސަރުކާރުން ނެރުނު ބަޔާނެއްގައި ބުނެފައިވަނީ ޣައްޒާގެ އަލް-ޝާތީ ސަރަޙައްދުގެ ދުވަސްވީ ރެފިއުޖީ ކޭމްޕަކަށް ދިން ހަމަލާއެއްގައި 24 މީހަކު މަރުވެފައިވާކަމަށާއި, އަދި އަލް-ތުއްފާހް ކިޔާ ސަރަހައްދެގެ ގެތަކަށް ދިން ހަމަލާތަކެއްގައިވެސް 18 މީހަކު މަރުވެފައިވާކަމަށެވެ.
މިހަމަލާތަކާއި ގުޅިގެން އިޒްރާއިލުގެ އަސްކަރިއްޔާއިން ބުނެފައިވަނީ ހަމަލާ ދީފައިވަނީ ހަމާސްގެ އަސްކަރީ ސިއްރު ކޭމްޕްތަކަށް ކަމަށެވެ.
މިދުވަސްކޮޅު އިޒްރާއިލާއި ލުބްނާން ބޯޑަރު ސަރަހައްދުގައި ހިޒްބުالله އަދި އިޒްރާއިލް އަސްކަރިއްޔާއާއި ދެމެދު ދެމުންގެންދާ ހަމަލާތައް ވަރުގަދަވެ, އެ ސަރަހައްދުގެ ހަނގުރާމަ އިތުރަށް ބޮޑުވެދާނެ ކަމުގެ ކަންބޮޑުވުންތައް ވަނީ އިތުރުވެފައެވެ.
