ޕާކިސްތާނުގައި ދިރިއުޅޭ އަފްޣާނިސްތާނުގެ އެއްވެސް ލިޔެކިޔުމެއް ނެތް ރެފިއުޖީން އަނބުރާ އަފްޣާނަށް ފޮނުވުމުގެ ޕްލޭނުގެ ދެވަނަ ފިޔަވަހި ފެށުމެށް ތައްޔާރުވެއްޖެއެވެ.
އާދިއްތަ ދުވަހުން ފެށިގެން ގާތްގަނޑަކަސް 800,000 އަށްވުރެ ގިނަ އަފްޣާނުގެ ރެފިއުޖީން އަނބުރާ ފޮނުވާލުމަށް ތައްޔާރުވަމުން އަންނައިރު, ފާއިތުވި އަހަރުގެ ނޮވެމްބަރު މަހުގައި ފުރަތަމަ ފިޔަވަހީގައި 541,000 މީހަކު ފޮނުވާލާފައިވެއެވެ.
ޕާކިސްތާނުގެ ސަރުކާރުންވަނީ އަފްޣާނިސްތާނުގެ ގާނޫނީ ލިޔެކިޔުން ނެތް ހުރިހާ ރެފިއުޖީން އަމިއްލަ އިޚްތިޔާރުގައި ނުގޮސްފިނަމަ ޑީޕޯޓްކޮށްލާނެ ކަމުގެ އިންޒާރު ދީފައެވެ. ފުރަތަމަ ފިޔަވީގައި މީހުން އަނބުރާ ފޮނުވާލުމުގެ ކުރިން ޕާކިސްތާނު ސަރުކާރުން ހާމަކޮށްފައިވާ ގޮތުގައި އެގައުމުގައި ގާތްގަނޑަކަށް 4.4 މިލިއަން އަފްޣާނުގެ ރެފިއުޖީން ތިބި ކަމަށެވެ. އަދި އޭގެތެރެއިން 1.73 މިލިއަން މީހުންނަކީ ގާނޫނީ ލިޔެކިޔުން ނެތް މީހުން ކަމަށެވެ.
ޕާކިސްތާނުގެ ސަރުކާރުގެ މިނިންމުމަށް ގިނަ ބައެއްގެ ފާޑުކިޔުންތައް އަމާޒުވެފައިވީނަމަވެސް އެގައުމުން ވަނީ އެގައުމުގެ ސަލާމަތާއި އިގްތިސާދުގެ ހާލަތު ހުރިގޮތުން މިއީ ކޮންމެހެން ކުރަންޖެހޭ ކަމެއް ކަމަށް ބުނެ އެ ނިންމުން ދިފާއުކޮށްފައެވެ.
އަދި މީގެ އިތުރުން މިދުވަސްވަރު ޕާކިސްތާނުގައި ހަމަލާތައް ގިނަވެފައިވަނީ އެގައުމުގައި ތިބި އަފްޣާނިސްތާނުގެ ރައްޔިތުންނާއި ގްރޫޕްތަކުން ކަމަށްވެސް ޕާކިސްތާނު ސަރުކާރުން ބުނެފައިވެއެވެ. އެހެން ނަމަވެސް އަފްޣާނިސްތާނުގެ ތާލިބާން ސަރުކާރުން މިކަން ދޮގުކުރެއެވެ.
މިގޮތަށް ޕާކިސްތާނުގައި ތިބި އަފްޣާނުގެ ރެފިއުޖީން އަނބުރާ އެމީހުންގެ ގައުމަށް ފޮނުވާލުމުން އެމީހުންގެ ރައްކާތެރިކަން ކަށަވަރުނުވާކަމަށް އެމްނެސްޓީ އިންޓަނޭޝަލްއިންވަނީ އިންޒާރުދީފައެވެ.
