ހަމާސްއިން ރަހީނުކޮށްފައިވާ އިޒްރާއިލުގެ ރައްޔިތުން ދޫކޮށްދިނުމަށް އެދި ހަމާސްއާއެކު މަޝްވަރާތައް އަލުން ފެއްޓުމަށް ވަފުދެއް ފޮނުވުމަށް ނިންމާފައިވާ ކަމަށް އިޒްރާއިލުގެ ބޮޑުވަޒީޒު ބެންޖަމިން ނަތަންޔާހޫ ބުނެފިއެވެ
ބުރާސްފަތި ދުވަހު އެމެރިކާގެ ރައީސް ބައިޑެން އާއި ނަތަންޔާހޫ އާ ދެމެދު އޮތް ފޯނު ކޯލެއްގައި ނަތަންޔާހޫ މިގޮތަށް ބުނެފައިވީ ނަމަވެސް މި މަޝްވަރާތައް ކުރިޔަށް ގެންދާނެ ދުވަހެއް އަދި އޮންނާނެ ތަނެއް ހާމަކޮށްފައި ނުވެއެވެ. އިޒްރާއިލުގެ ޗެނަލް 12 އިން ހާމަކޮށްފައިވާ ގޮތުގައި މި މަޝްވަރާތައް ކުރުމަށް ފޮނުވާނީ އިޒްރާއިލުގެ އިންޓެލިޖްންސް އޭޖަންސީ ކަމުގައިވާ މޮސާދެވެ. އެހެން ނަމަވެސް އިޒްރާއިލުން މިކަން ރަސްމީކޮށް ކަށަވަރުކޮށްދީފައި ނުވެއެވެ.
މިކަމާއި ގުޅިގެން އެމެރިކާގެ ވައިޓް ހައުސްއިން ނެރުނު ބަޔާނެއްގައި ބުނެފައިވަނީ ނަތަންޔާހޫގެ މި ނިންމެވުމަށް އެމީހުން މަރުހަބާ ކިޔާ ކަމަށާއި މި މަޝްވަރާތަކުގައި ދެފަރާތުގެ މެދުވެރިއެއްގެ ގޮތުގައި އެމެރިކާ, ގަތަރު އަދި މިސްރުން ބައިވެރިވާނެ ކަމުގައެވެ.
ހަމާސްގެ އޮފިޝަލަކު މީގެ ކުރިން ބުނެފައިވަނީ އެމެރިކާއިން ހުށައަޅާފައިވާ ސުލްހައިގެ ޑީލަށް އެއްބަސް ވެވޭނީ ހަނގުރާމަ މުޅިން ހުއްޓާލައި ޣައްޒާއިން އިޒްރާއިލުގެ ސިފައިން ފައިބަން އެއްބަސްވުމުން ކަމަށެވެ. އެހެން ނަމަވެސް އިޒްރާއިލުން ވަނީ މި ޝަރުތަށް އެއްބަސްވުމަށް ދެކޮޅު ހަދާފައެވެ.
އޮކްޓޯބަރު 7 ވަނަ ދުވަހުން ފެށިގެން އިޒްރާއިލުން ޣައްޒާގައި ކެނޑިނޭޅި ހަމަލާދެމުން ގެންދާއިރު މިހަމަލާތަކުގައި މިހާތަނަށް 38,000 މީހަކު މަރުވެފައި ވެއެވެ.
