އިސްރާއީލު ސިފައިންގެ ޓޭންކުތަކާއި ވައިގެ ހަމަލާތަކުން ޣައްޒާގެ އުތުރާއި މެދު ސަރަޙައްދުތަކުގައި 14 މީހުން މަރާލައިފިއެވެ.
ޣައްޒާގެ ނުސައިރާތު ރެފިއުޖީ ކޭމްޕުގައި އިސްރާއީލު ޓޭންކުތަކުގެ ހަމަލާއިން 8 މީހުން މަރުވެ، އެތައް ބަޔަކު ޒަޚަމްވިއެވެ. އަދި ޣައްޒާ ސިޓީގައި ގެއަކަށް ދިން ވައިގެ ހަމަލާއަކުން 6 މީހުން މަރުވިއެވެ. މީގެ އިތުރުން، އުތުރުގައިވާ ބައިތު ހާނޫން ރަށުގައި ކާރަކަށް ދިން ހަމަލާއަކުން އެތައް ބަޔަކު މަރުވެ ޒަޚަމްވިއެވެ.
ރަފާހު ސިޓީގައި އިސްރާއީލު ސިފައިން މެއި މަހުން ފެށިގެން ހަރަކާތްތެރިވަމުން އަންނައިރު، އުތުރު-ހުޅަނގު ސަރަޙައްދަށް އިތުރަށް ވަދެ، ވައިގެ ހަމަލާތައް ވަރުގަދަކޮށް ކުރިއަށް ދިޔަކަމަށް ރައްޔިތުން ބުނެފައިވެއެވެ. އިސްރާއީލު ސިފައިން ރަފާހުގައި ހިންގި އޮޕަރޭޝަންތަކުގައި ސަތޭކަ ފަލަސްތީނު ހަނގުރާމަވެރިން މަރާލައި، ބިމުއަޑީގެ ހޮޅިއެޅުންތަކާއި ގޮވާ ތަކެތި ހޯދައި، އަސްކަރީ ވަސީލަތްތައް ނައްތާލިކަމަށް އިސްރާއީލު ސިފައިން ބުނެފައިވެއެވެ.
އިސްރާއީލާއި ހަމާސްއާ ދެމެދު ހުއްޓުމެއް ގެނައުމަށް ބައިނަލްއަޤްވާމީ މަސައްކަތްތަކެއް ކުރެވެމުންދެއެވެ. ނަމަވެސް، ރަފާހާއި މިސްރުގެ ދެމެދުގައިވާ ސަރަޙައްދުގެ ބާރު އިސްރާއީލުގެ އަތުގައި ބޭއްވުމަށް އެ ޤައުމުން ބޭނުންވުމާއި، ހަމާސްގެ ބަންދުގައިވާ އިސްރާއީލު ރަހީނުންނާއި އިސްރާއީލުގެ ބަންދުގައިވާ ފަލަސްތީނު ބަންދީން ދޫކޮށްލުމުގެ ކަންކަން ހައްލުނުވެ ހުރުމުން، އެއްބަސްވުމަކަށް ނާދެވެއެވެ.
މި ހަނގުރާމައިގައި މިހާތަނަށް 41،000 އަށްވުރެ ގިނަ ފަލަސްތީނުން މަރުވެފައިވާއިރު، 2.3 މިލިއަން މީހުންގެ އާބާދީގެ ގިނަ ބަޔަކު ގެދޮރު ދޫކޮށް ދާން މަޖުބޫރުވެފައިވެއެވެ. އަދި ކާބޯތަކެތީގެ ބޮޑު ހާސްކަމެއް ކުރިމަތިވެފައިވެއެވެ. އިސްރާއީލުން ބުނަނީ އެ ޤައުމުށް ނުރައްކާވާ ކަމަށް ދެކޭ ހަމާސް ނައްތާލުމަށް މަސައްކަތްކުރަމުންދާނެ ކަމަށެވެ.
