އިންޑޮނޭޝިއާގެ އިރުމަތީ ސަރަހައްދުގައި ހުރި ލެވޮޓޮބީ ލަކި-ލަކި އަލިފާން ފަރުބަދަ އިން މިއަދު ހޮނިހިރު ދުވަހު އަނެއްކާވެސް ގޮވައި، އަޅިއާއި ދުން އަރައިފިއެވެ. މިފަހަރު އަޅިއާއި ދުން އަރައިފައިވަނީ 5 މޭލު [8 ކިލޯމީޓަރު] އުސްމިނަށެވެ.
މިދިޔަ އާދިއްތަ ދުވަހު [ނޮވެމްބަރ 3] ހިނގި ބޮޑު އަލިފާންފަރުބަދަ ގޮވުމުގެ ހާދިސާ ތަކުގެ ސަބަބުން 9 މީހުން މަރުވުމާ ގުޅިގެން، އަލިފާންފަރުބަދައާ އެންމެ ކައިރީގައި ދިރިއުޅޭ 16،000 މީހުން ސަލާމަތްކުރުމުގެ މަސައްކަތް ސަރުކާރުން ވަނީ ފަށާފައެވެ.
އިންޑޮނޭޝިއާގެ ކާރިސާތަކާބެހޭ އިދާރާގެ މައުލޫމާތުން ދައްކާގޮތުގައި މިހާތަނަށް 10،700 މީހުން ވަނީ ރައްކާތެރި ސަރަހައްދުތަކަށް ބަދަލުކުރެވިފައެވެ.
ގެދޮރު ދޫކޮށް ދިޔަ ޝަރުލިއާނާ އޮސެ ސޯގެ ބުނީ “އަޅުގަނޑުމެންނަށް މިތަނުގައި ކާއެއްޗެއްސާއި ފެން ލިބޭ. ނިދަން ތިބެންވެސް ރަނގަޅު. އެކަމަކު ކުޑަކުދިން ތިބި މީހުންނަށް އަދިވެސް ނިދަނީ ތަޅުންގަނޑުގައި އޮށޯވެގެން. ގޮދަޑިއެއްވެސް ނެތް. އަދި ކުޑަކުދިންނަށް ބޭނުންވާ ތަކެތިވެސް މަދު” ކަމަށެވެ.
އޮފިޝަލުން ބުނާގޮތުގައި އަލިފާންފަރުބަދައިގެ ހުޅަނގާއި އުތުރު ފަރާތުގައި މީހުން ނުވަދެވޭ ސަރަހައްދު 5 މޭލުން 5.6 މޭލަށް [9 ކިލޯމީޓަރު] ބޮޑުކުރުމަށް ވަނީ ނިންމާފައެވެ.
ކާރިސާތަކާބެހޭ އިދާރާގެ އޮފިސަރު އަގުސް ރިޔާންޓޯ ބުނާގޮތުގައި މިހާރު 3 ވަގުތީ އަވަސް އެހީދޭ މަރުކަޒު ޤާއިމުކުރެވި، އިތުރު 3 މަރުކަޒު ތައްޔާރުކުރަމުންދެއެވެ. އަދި އޭނާ ބުނާގޮތުގައި މީގެ އިތުރުންވެސް މަރުކަޒުތައް ބޭނުންވެދާނެއެވެ.
ހުކުރު ދުވަހު [ނޮވެމްބަރ 8] ލެވޮޓޮބީ އަލިފާންފަރުބަދަ ގޮވައި، އެކި ފަހަރު މަތިން އަޅިއާއި ދުން އަރާފައިވެއެވެ. އެންމެ އުސްކޮށް އަޅިއާއި ދުން އަރާފައިވަނީ 6.2 މޭލު [10 ކިލޯމީޓަރު] އުސްމިނަށެވެ.
