އަރްމީނިއާއިންވެސް ފަލަސްތީނަކީ މިނިވަން ޤައުމެއްގެ ގޮތުގައި ބަލަގެންފައިވާކަން އެޤައުމުގެ ފޮރިން މިނިސްޓަރު ހާމަކޮށްފިއެވެ.
ހުކުރު ދުވަހު އަރްމީނިއާގެ ފޮރިން މިނިސްޓަރު މިގޮތަށް ވިދާޅުވެފައި މިވަނީ ވަރަށް ގިނަ ގައުމުތަކުން ފަލަސްތީނަކީ މިނިވަން ވަކި ދައުލަތެއްގެ ގޮތުގައި ބަލައިގަމުން އަންނަ ދަނޑިވަޅެއްގައެވެ. އަދި މިހާރު ޣައްޒާގައި އިޒްރާއިލުން ދެމުން ގެންދާ ލާއިންސާނީ ހަމަލާތައް އަރްމީނިއާއިންވެސް ކުށްވެރިކޮށްފައިވެއެވެ.
އަރްމީނިއާ އަކީވެސް އެގައުމާ ޖެހިގެން އޮންނަ ގައުމު ކަމަށްވާ އަޒަބައިޖާނާ އެކު އެތަކެއް އަހަރުތަކެއް ވަންދެން ހަނގުރާމަ ކުރަމުން އަންނަ ގައުމެއްކަން ފާހަނގަ ކޮށްލެވެއެވެ. އަދި އިޒްރާއިލަކީ އަރްމީނިއާ އާއި އިދިކޮޅު އަޒަބައިޖާނަށް ހަތިޔާރު ފޯރުކޮށްދޭ އެންމެ ބޮޑު ސަޕްލަޔަރެވެ.
އަރްމީނިއާއިން ފަލަސްތީނުގެ ދައުލަތް ބަލައިގަނެފައިވުމުން ފަލަސްތީނުގެ ސަރުކާރުންވަނީ އެކަމާ އުފާކޮށް އެގައުމަށް ޝުކުރު އަދާކޮށްފައެވެ. އަދި މިއީ ފަލަސްތީނުގެ ހާލުގައި ޖެހިފައިވާ ރައްޔިތުންނަށް އިންސާފަށް ދަތުރުކުރާ މަގުގައި ލިބުނު އިތުރު ކާމިޔާބެއް ކަމަށް ސިފަކޮށްފައިވެއެވެ.
އިޒްރާއިލުން ފަލަސްތީނުގެ ޣައްޒާގައި ދެމުންދާ ހަމަލާތަކުގައި މިހާތަނަށް 37,431 މީހަކު މަރުވެފައި ވެއެވެ.
