ފަލަސްތީނުގެ ޣައްޒާގައި 66 އަހަރުގެ މުސްކުޅި އަންހެނަކަށް އިޒްރާއިލުގެ އަސްކަރީ ކުއްތާއެއް ހަމަލާދީ ދަމާފައި ގެންދާ ވީޑިއޯ އެއް ސޯޝަލް މީޑިއާގައި ދައުރުވާން ފަށައިފިއެވެ.
މި ހަފްތާގައި އަލްޖަޒީރާ ނެޓްވޯކުން ބްރޯޑްކާސްޓް ކުރި މި ވީޑިއޯއިން ފެންނަ ގޮތުގައި އެ އަންހެން މީހާ އެދުމަތީގައި އޮއްވާ އިޒްރާއިލް ސިފައިން އެމީހާއަށް ހަމަލާދޭން ފޮނުވައި އެކުއްތާ އެމީހާ ގައިގައި ދަތް އަޅައި ދަމާފައި ގެންދެއެވެ. އެގޮތަށް ހަމަލާދޭން އެކުއްތާ ފޮނުވީ އެ އަންހެންމީހާ ގެއިން ނުކުންނަން އަމުރުކުރުމުންވެސް ގެއިން ނުކުމެފައި ނުވާތީ ކަމަށް ޚަބަރުތަކުގައި ރިޕޯޓްކޮށްފައިވެއެވެ.
ދައުލަތު އަބްދުލް ތަނާނީ ނަމަކަށް ކިޔާ މިއަންހެންމީހާއަށް މި ހަމަލާތަކުގެ ސަބަބުން ވަރަށް ބޮޑަށް އަނިޔާވެ ގައިގެ އެކި ތަންތަނުން ބިންދައިގެން ގޮސްފައިވެއެވެ. އަދި ރަނގަޅު ފަރުވާ ދޭނެ ހޮސްޕިޓަލެއް ނެތުމުން އެމީހާއަށް އެކަށީގެންވާ ފަރުވާ ލިބިފައި ނުވެއެވެ.
މިދިޔަ ފެބްރުއަރީ މަހުގައި އިޒްރާއިލް ނޫހަކުން ހާމަކުރި ގޮތުގައި ޔަހޫދީ އަސްކަރިއްޔާއިން ވަނީ ހަނގުރާމައިގައި ބޭނުން ކުރަން ކުއްތާތަކެއް ގަންނަން ފަށާފައެވެ. އަދި ހަމަލާދޭން ޓްރެއިން ކޮށްފައިވާ މި ކުއްތާތައް ގަންނަނީ ނެދަލެންޑްސް އަދި ޖަރުމަނުން ކަމަށްވެސް ހާމަ ކޮށްފައިވެއެވެ.
އެހެން ނަމަވެސް ހަނގުރާމަތަކުގައި މީހުންނަށް ހަމަލާދޭން މިގޮތަށް ކުއްތާތައް ބޭނުންކުރުމަކި ބައިނަލްއަގުވާމީ ގަވާއިދުތަކާއި ޚިލާފުކަމެކެވެ.
އަލްޖަޒީރާ އިން ލީކު ކޮށްލި މި ވީޑިއޯ އަކީ ހަމަލާދިން ކުއްތާގައި ހަރުކޮށްފައިހުރި ކެމެރާއަކުން ނަގާފައިވާ ވީޑިއޯއެކެވެ.
