އިޒްރާއިލުން ފަލަސްތީނުގެ ޣައްޒާގައި ދެމުން އަންނަ ހަމަލާތައް ދާއިމީ ގޮތެއްގައި ހުއްޓާލައިފިނަމަ އިޒްރާއިލް-ލުބްނާން ބޯޑަރުގައި ހިޒްބުالله އިން ދެމުންގެންދާ ހަމަލާތައް ހުއްޓާލާނެ ކަމަށް އެ ޖަމާއަތުން ބުނެފިއެވެ.
އަންގާރަ ދުވަހު އިރާނުގެ ސަޕޯޓު އޮންނަ ހިޒްބުالله އިން ބުނެފައިވާ ގޮތުގައި އެޖަމާއަތުން ހަނގުރާމަ ކުރަމުން އަންނަނީ ހަމާސްއަށް އެހީތެރިވުމަށް ކަމަށާއި, ޣައްޒާގައި ހަމަލާތައް ހުއްޓާލައިފިނަމަ އެއްވެސް އިތުރު މަޝްވަރާއެއް ކުރުމެއް ނެތި އެޖަމާއަތުން ދެމުން އަންނަ ހަމަލާތައް ހުއްޓާލާނެ ކަމަށެވެ.
އިޒްރާއިލުން ޣައްޒާގައި ދެމުން އަންނަ ހަމަލާތަކުގައި މިހާތަނަށް 38000 އަށްވުރެ ގިނަ މީހުން މަރުވެފައިވާއިރު, ހަމަލާތައް ހުއްޓާލުމަށް ދެފަރާތުން ކުރަމުން އަންނަ މަޝްވަރާތަކަށް އެއްވެސް ކުރިއެރުމެއް ލިބިފައި ނުވެއެވެ. ހަމާސް އިން ހަމަލާތައް ހުއްޓާލުމަށް ކުރާ ޝަރުތަކީ ދާއިމީ ގޮތެއްގައި ހަމަލާތައް ހުއްޓާލުމެވެ. އެހެން ނަމަވެސް އިޒްރާއިލުގެ ބޮޑުވަޒީރު ނަތަންޔާހޫ ބުނެފައިވަނީ ހަމާސް މުޅިން ނައްތާނުލެވެނީސް އެ ޝަރުތައް އެއްބަސް ވެވެން ނެތް ކަމަށެވެ.
އިޒްރާއިލުން ޣައްޒާގައި ދެމުން އަންނަ ހަމަލާތަކާއި އަދި ހިޒްބުالله އިން ލުބްނާނު ބޯޑަރުގައި ދެމުން އަންނަ ހަމަލާތަކުގެ ސަބަބުން މެދުއިރުމަތީގެ ހާލަތުވަނީ ވަރަށް ބޮޑަށް ގޯސްވެފައެވެ.
