ރަޝިއާގެ ގޮނޑުދޮށް ސަރަހައްދުގައި ހުރި ޝިވެލޫޗް އަލިފާން ފަރުބަދަ ގޮވާ 5 މޭލު މައްޗަށް އަޅިތައް އަރައިގެން ގޮސްފިއެވެ.
ކަމްޗަކްތާގައި ހުންނަ މިފަރުބަދަ ގޮވާފައި ވަނީ ރިކްޓާ މިންގަނޑުން 7 ގެ ބާރުމިނުގައި އައި ބިންހެލުމާއެކު އެވެ. ފަރުބަދަ ގޮވި ބާރުމިނުގައި ބޭރުވެގެން ދިޔަ އަލިފާނުގެ ވިދުވަރާއެކު އަޅިތައް އަރައިގެން ގޮސް ޖައްވު އަލިކޮށްލާފައިވާ ތަން ރަޝިއާގެ އިރުމަތީ ބިތުގެ ސިސްމޮލޮޖީ ޑިޕާޓުމަންޓުން އާންމުކޮށްފައިވާ ފޮޓޯއިން ފެނިގެންދެއެވެ.
ރަޝިއާގެ އިރުމަތީ ބިތުގެ ސިސްމޮލޮޖީ ޑިޕާޓުމަންޓުން އެފޮޓޯ އާންމުކޮށް ބުނެފައިވަނީ ފަރުބަދަ ގޮވާފައިވަނީ އައި ބާރުގަދަ ބިންހެލުމެއްގެ ސަބަބުން ކަމަށެވެ.
ގާތްގަނޑަކަށް 180،000 މީހުން އެސަރަހައްދުގައި ދިރިއުޅެމުން އަންނައިރު، މިހާދިސާގެ ސަބަބުން އެއްވެސް މީހަކަށް ގެއްލުން ވެފައެއް ނުވެއެވެ. އަދި މިބިންހެލުމުގެ ސަބަބުން މާބޮޑު ގެއްލުމެއް ނުވާ ކަމަށާއި އެހެންނަމަވެސް ބިންހެލުމާއި ފަރުބަދަ ގޮވުމާއެކު ދިމާވި ކަންކަން ދެނެގަތުމަށް އިދާރާތަކުން މަސައްކަތް ކުރަމުން އަންނަ ކަމަށް ރަޝިއާގެ ޓާސް ނިއުސް އެޖެންސީން ބުނެފައިވެއެވެ.
މިބިންހެލުން އައީ ބިމު އަޑިން 30 މޭލު އަދި ޕެޓްރޮޕަވަލޮވްސްކް-ކަމްޗަޓްސްކީ އާ 55 މޭލު ދުރުން ކަމަށާއި މި ބިންހެލުމާ ގުޅިގެން ސުނާމީއެއް އުފެދިދާނެ ކަމަށް އެމެރިކާގެ ޖިއޮލޮޖިކަލް ސާވޭ އިން ބުނެފައިވެއެވެ. އެހެންނަމަވެސް ޓާސް އިން ބުނެފައި ވަނީ ސުނާމީއެއްގެ ބިރެއް ނެތް ކަމަށެވެ.
